राष्ट्रिय मानव अधिकार आयोगका अध्यक्ष अनूपराज शर्माले मानसिक स्वास्थ्यको क्षेत्रमा देखिएका समस्या समाधानका लागि सरोकारवाला सबै पक्षको साझा प्रयास आवश्यक रहेको बताएका छन् ।
आयोग, मानसिक स्वास्थ्यको क्षेत्रमा काम गर्दै आएको कोशिसलगायतका संस्थाले मङ्सिर ५ गतेदेखि ललितपुरमा आयोजना गरेको मानसिक स्वास्थ्य र मानव अधिकार विषयक पाँचदिने प्रशिक्षक प्रशिक्षण तालिममा अध्यक्ष शर्माले सो कुरा बताएका हुन् ।
उनले भने-‘द्वन्द्वको चपेटाबाट उठ्न नपाउँदै विनाशकारी भूकम्प गएकाले मानसिक स्वास्थ्यको समस्या बढेको छ । यस्तो बेलामा राज्य एक्लैको मुख ताक्नु भन्दा पनि सबैको साझा प्रयासको आवश्यकता छ ।’
कार्यक्रममा स्वास्थ्य मन्त्रालयका प्रतिनिधि भोगेन्द्रराज डोटेलले विगतका दिनको तुलनामा मानसिक स्वास्थ्यको क्षेत्रमा सरकारले केही काम थालेको बताए । उनले भने-‘हामीले थालेको काम पर्याप्त छैन । तर, सुरुवात चाँही गरिएको छ ।’
पाँचदिनसम्म सञ्चालन गरिने तालिममा मानसिक स्वास्थ्यलाई मानव अधिकारको विषयसँग जोडेर पैरवी गर्नसक्ने सीपमा जोड दिइने कोशिसका अध्यक्ष मातृका देवकेटाले जानकारी दिए । कार्यक्रममा यूएनडिपीकी एक्टिङ कन्ट्री डाइरेक्टर साेफी केमखाड्जे (Sophie Kemkhadze) ले मानिसक स्वास्थ्यलाई राज्यले प्राथमिकतामा राख्नुपर्ने बताइन् ।