नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टीको कार्यकर्ता भएको आरोपमा प्रहरीले पाँचखपन गाँउपालिका–४ बाट ३९ वर्षीय छिरिङ्ग शेर्पालाई भदौ १२ गते गिरफ्तार गरेको छ ।
आरोपित सो पार्टीको कार्यकर्ता भएको र ०७५ वैशाख १७ गते खाँदबारी नपा–९ स्थित तुम्लिङ्गटारमा रहेको ९ सय मेगावाट क्षमताको अरूण तेस्रो जलविद्युत आयोजनामा बम विष्फोट घटनामा संलग्न भएको अभिलेख देखिएकाले गिरफ्तार गरेको प्रहरीले जनाएको छ ।
यसैबीच सो पार्टीको कोशी व्यूरो संयोजकसहित चार जना कार्यकतालाई प्रहरीले भदौ ११ गते जिल्ला अदालत चैनपुरमा हाजिर गराएको छ ।
सुनसरी जिल्ला अदालतमा भदौ १० गते धरौटी बुझाएर रिहा भए लगत्तै पुनः गिरफ्तारीमा परेकाहरूलाई सङ्खुवासभा प्रहरीले गिरफ्तार गरी अदालतमा हाजिर गराएको हो ।
जिल्ला अदालत सुनसरीमा जनही ५० हजार रुपियाँ धरौटी बुझाएर रिहा भएलगत्तै प्रहरीले सो पार्टीका कोशी व्यूरो संयोजक घनश्याम श्रेष्ठ, मोरङ जिल्ला इञ्चार्ज कृष्णकुमार श्रेष्ठ, व्यूरो सदस्य माधव गौतम र रमेश खड्कालाई गिफ्तार गरी सङ्खुवासभा पुर्याएको थियो ।
प्रहरीले व्यूरो संयोजक ओखलढुङ्गाका घनश्याम श्रेष्ठ र काभ्रे घर भएका व्यूरो सदस्य माधव गौतमलाई ०७५ चैत १० गते मोरङको कानेपोखरीबाट गिरफ्तार गरेको थियो ।
भोजपुर घर भएका मोरङ जिल्ला इञ्चार्ज कृष्णकुमार श्रेष्ठलाई चैत १२ गते मोरङ सुन्दरहरैचाबाट र रमेश खड्कालाई सुनसरीको इटहरीबाट गिरफ्तार गरेको थियोे ।
प्रहरीले ०७५ फागुन १५ गते हतियारसहित पाँचथरका देवकुमार साँवा लिम्बूलाई समेत सो पार्टीको कार्यकर्ता भएको आरोपमा गिरफ्तार गरेको थियो ।