सान्नित्रिवेणी गाउँपालिका–२ की २० वर्षीया सविना बुढालाई ३० वर्षीय जेठाजु पूर्ण बुढाले कुटपिट गरी घर निकाला गरेको चैत २१ गते जिल्ला प्रहरी कार्यालय, कालिकोटमा उजुरी दिएकी छिन् ।
परपुरूषसँग अनैतिक सम्बन्ध राखेको आरोप लगाउँदै जेठाजुले चैत २० गते राति घरमा कुटपिट गरी घर निकाला गरेको भन्दै पीडितले जिल्ला प्रहरी कार्यालयमा उजुरी दिएको डिएसपी विनोद शर्माले जानकारी दिए ।
जेठाजुको कुटाइबाट घाइते भएकी पीडित महिलाको उपचार जिल्ला अस्पताल कालिकोटमा गरिएको डिएसपी शर्माले बताए ।
पीडितको उजुरीका आधारमा आरोपितलाई तत्काल गिरफ्तार गरी अनुसन्धान प्रक्रिया अगाडि बढाउने जिल्ला प्रहरी कार्यालय, कालिकोटले जनाएको छ ।