सरकारले प्रतिबन्ध लगाएको नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका कार्यवहाक कोशी व्युरो संयोजक ओखलढुंगा घर भएका ३८ वर्षीय घनश्याम श्रेष्ठ (पुष्कर) र काभ्रे घर भएका कोशी व्युरो सदस्य ५५ वर्षीय माधव गौतम (आकाश शर्मा) लाई मोरङ प्रहरीले चैत १० गते गिरफ्तार गरेको छ ।
प्रहरीले उनीहरुलाई कानेपोखरी गाउँपालिका–४ नारायणचोकबाट गिरफ्तार गरेको सो पार्टीका कोशी व्युरो सदस्य प्रज्वल श्रेष्ठले बताए ।
गिरफ्तार गरिएका उनीहरुलाई कहाँ लगिएको छ भन्ने थाहा नदिइ बेपत्ता बनाएको सदस्य श्रेष्ठले आरोप लगाएका छन् ।
श्रेष्ठले इन्सेक प्रदेश कार्यालय विराटनगरमा समेत फोन गरी गिरफ्तार गरिएकाहरुको अवस्था बुझिदिन आग्रह गरेका छन् ।
जिल्ला प्रहरी कार्यालय मोरङका एसपी मनोजकुमार केसीले उनीहरु गिरफ्तारीमा परेको जानकारी नभएको बताए ।
पार्टीका पूर्वी कमाण्ड इञ्चार्ज अनिल शर्मा विरहीले एक विज्ञप्ति जारी गर्दै गिरफ्तारीमा परेकाहरुलाई रिहा गर्न माग गरेका छन ।