कनकासुन्दरी गाउँपालिका–५ लुड्कुस्थित कनकासुन्दरी माध्यमिक विद्यालयमा पहिचान नखुलेको समूहले जेठ २१ गते राति प्रवेश गरी तोडफोड तथा आगजनीको प्रयास गरेको छ। घटनाबाट विद्यालयका डिजिटल उपकरण, शैक्षिक सामग्री तथा पूर्वाधारमा ठूलो क्षति पुगेको विद्यालय प्रशासनले जनाएको छ।
विद्यालयका प्रधानाध्यापक नारायण न्यौपानेका अनुसार २१ गते राति करिब ९ बजेपछि पहिचान नखुलेको समूह विद्यालय परिसरमा प्रवेश गरी मुख्य विद्युत लाइनको एमसीबी बन्द गरेर तारहरू काटेका थिए। त्यसपछि कार्यालय र कक्षाकोठामा रहेका विभिन्न उपकरणहरू तोडफोड गरिएको थियो।
तोडफोडबाट १० ओटा कम्प्युटरका सीपीयू, दुई ओटा ल्यापटप, स्मार्ट डिजिटल बोर्डको पावर केबल, ई–हाजिर प्रणाली, तीन ओटा सीसीटीभी क्यामेरा, आरजे केबल, पाँच ओटा हेड माइक, माइक हर्न तथा दुई ओटा प्रोजेक्टरमा क्षति पुगेको विद्यालयले जनाएको छ।
विद्यालय प्रशासनका अनुसार केही सामग्री विद्यालयभन्दा करिब १ सय मिटर तल रहेको खोलाको किनारमा फालिएको अवस्थामा फेला परेको छ। त्यहाँबाट भित्ते घडी, डेस्कटप कम्प्युटर तथा सीसीटीभी क्यामेरा लगायतका सामग्री फेला परेको छ ।
घटनाको सबैभन्दा गम्भीर पक्ष कक्षा ११ का विद्यार्थीहरूको परीक्षाका उत्तरपुस्तिका जलाउने प्रयास रहेको विद्यालयले जनाएको छ। कोठाभित्र सुरक्षित राखिएका उत्तरपुस्तिकामा आगो लगाइएको र केही उत्तरपुस्तिका आंशिक रूपमा जलेको अवस्थामा फेला परेको प्रधानाध्यापक न्यौपानेले जानकारी दिनु भयो । घटनाको कारणबारे अनुसन्धान भइरहेपनि परीक्षा तथा विद्यालयसँग सम्बन्धित कुनै रिसइबीका कारण यस्तो कार्य भएको हुन सक्ने प्रारम्भिक अनुमान गरिएको छ।
कनकासुन्दरी गाउँपालिकाका शिक्षा शाखा प्रमुख जीवन रोकायाले शैक्षिक संस्थामाथि भएको यस्तो आपराधिक गतिविधि अत्यन्त दुःखद र निन्दनीय भएको बताउँदै दोषीको पहिचान गरी कानुनी दायरामा ल्याउन सम्बन्धित निकायसँग आग्रह गर्नुभयो । उहाँले विद्यालयमा भएको क्षतिको यथार्थ विवरण संकलन गरी आवश्यक सहयोग तथा पुनःस्थापनाका लागि गाउँपालिकाले पहल गर्ने बताउनु भयो ।
विद्यालयका निमित्त प्रधानाध्यापक मरिचमान काफ्लेद्वारा हस्ताक्षरित पत्र मार्फत प्रहरी चौकी गोठिज्युला जुम्लालाई घटनाको निष्पक्ष छानबिन गरी दोषीमाथि कडा कारबाही गर्न अनुरोध गरिएको छ। हाल प्रहरीले घटनास्थलको मुचुल्का तयार गरी प्रारम्भिक अनुसन्धान अघि बढाएको छ।