अन्तरजातीय विवाह गरेका कारण घर निकाला गरिएकी कुमाख गाउँपालिका–६ च्याउखोला निवासी २० वर्षीया एलीसा बिकलाई इन्सेकले न्यायका लागि पहल गरेको छ ।
एलीसाले ०७३ सालमा २२ वर्षीय टिकाराम रावतसँग अन्तरजातीय प्रेम विवाह गरेकी थिइन् । विवाह भएको केही महिनापछि घर परिवार र पतिले समेत हेला गर्दै आएको उनले पीडा पोखिन् ।
पति र ५४ वर्षीय ससुरा भागीराम रावतले तल्लो जातकी भएको भन्दै घरमा बस्न पाइदैन भनी माघ २९ गते कुटपिट गरी घरनिकाला गरेको उनले बताइन् ।
काखमा डेढ वर्षको छोरी लिएर उनी न्याय खोज्दै फागुन २ गते सल्यानको सदरमुकाम खलङ्गा आएकी थिइन ।
घरमा बस्ने वातावरण नभएपछि सदरमुकाम आएकी उनले इन्सेकको पहलमा फागनु २ गते जिल्ला प्रहरी कार्यालय सल्यानमा घरेलु हिंसाको निवेदनसमेत दिएकी छन् ।
जाजरकोट माइती भएकी उनले अहिले त्यहाँ जान सम्भव नभएको र घर परिवारमा बस्न नदिएपछि बास बस्न अप्ठेरो परेको बताइन् ।
यस विषयमा इन्सेकले पीडित महिलाको बास बस्ने स्थान पनि नभएको र साथमा पैसा पनि नभएको बताएपछि रेस सल्यानले सञ्चालन गरेको सेफ हाउसमा बस्ने व्यवस्था मिलाइएको छ ।
मुद्दा नटुङ्गिदासम्म पीडितलाई बास बस्ने खाँचो रहेको थाहा पाएपछि सेफ हाउसका सञ्चालक रामचन्द्र रेग्मीसँग कुरा गरेपछि पीडितलाइ बासस्थानको व्यवस्था मिलाइएको हो ।