१६ वर्षीया बालिकालाई बलात्कार गरेको आरोपमा जिल्ला अदालत चितवनले भरतपुर महानगरपालिका–२४ का ४२ वर्षीय विष्णु सापकोटालाई १३ वर्ष कैदको फैसला सुनाएको छ ।
न्यायाधीश मुरारीबाबु श्रेष्ठको इजलासले फागुन १ गते उक्त फैसला गरेको अदालतका सूचना अधिकारी केशव पौडेलले बताए । उक्त फैसलाका साथै पीडितलाई २० हजार रुपियाँ क्षतिपूर्ति भराउने फैसला समेत भएको उनले बताए ।
पीडित बालिकालाई गत भदौ २३ गते बलात्कार गरेको आरोपमा पीडित पक्षले आरोपितविरूद्ध भदौ २५ गते जिल्ला प्रहरी कार्यालय चितवनमा उजुरी दिएको थियो ।
प्रहरीले आरोपितलाई भदौ २४ गते गिरफ्तार गरेको थियो । पीडित बालिकाको स्वास्थ्य परीक्षण भदौ २६ गते भरतपुर अस्पतालमा गरिएको थियो ।
त्यसैगरी १२ वर्षीया बालिकालाई बलात्कार गरेको आरोपमा जिल्ला अदालत चितवनले राप्ती नगरपालिका–४ भवानीपुरका २० वर्षीय अनिल राईलाई सात वर्ष कैदको फैसला सुनाएको छ ।
न्यायाधीश मुरारीबाबु श्रेष्ठको इजलासले फागुन १ गते उक्त फैसला गरेको अदालतका सूचना अधिकारी केशव पौडेलले बताए ।
पीडित बालिकालाई आरोपितले गत मङ्सिर १५ गते बलात्कार गरेको भन्दै पीडित पक्षले आरोपित विरूद्ध मङ्सिर १७ गते इलाका प्रहरी कार्यालय खैरहनीमा उजुरी दिएको थियो ।
पीडित पक्षको उजुरीका आधारमा प्रहरीले आरोपितलाई १७ गते नै गिरफ्तार गरेको थियो । पीडित बालिकाको स्वास्थ्य परीक्षण मङ्सिर १९ गते भरतपुर अस्पतालमा गरिएको थियो ।