मुसिकोट नपा–५ सेरीगाउँका दुई बालिका एक महिनादेखि बेपत्ता भएपछि बेचबिखनको आशङ्का गरेर परिवारले जिल्ला प्रहरी कार्यालय रुकुम पश्चिम र मुसिकोट नगरपालिकाको न्यायिक समितिमा पुस २६ गते खोजविन तथा उद्धारका लागि निवेदन दिएको छ ।
कात्तिक १० गते घरबाट हराएका १८ वर्षीया टिका परियार र १३ वर्षीया नेहा परियार मङ्सिर ३० गते परिवारको सम्पर्कमा आएपनि त्यसपछि सम्पर्कविहीन भएका हुन् । झापा घर बताउने दिपु मगरले टीकालाई विवाह गर्ने र नेहालाई शहर घुमाउने भनेर लगेको उनीहरूले परिवारसँग बताएका थिए ।
पहिले त्यहि कुरामा विश्वस्त भएपनि अहिले उनीहरू सम्पर्कविहीन भएपछि बेचबिखनको शङ्का लागेर खोजी गरिदिन प्रहरी र नगरपालिकामा निवेदन दिएको नेहाकी आमा गोमा परियारले जानकारी दिइन ।
आफ्ना छोरीहरू एक महिनादेखि सम्पर्कमा नआएपछि बेचबिखनमा परेको आशङ्का गरेर खोजी गरिदिनका लागि नगरपालिकामा निवेदन पेश गरेको मुसिकोट नगरपालिका कार्यालयका बाल अधिकार अधिकृत मानवीर ओलीले बताए ।
निवेदनपछि प्रहरी र नगरपालिकाको पहलमा उनीहरूको फोटो, हुलियासहित कल डिटेल बुझ्न फोन नम्बर बालबालिका खोजतलास केन्द्र काठमाडौँमा पठाएर खोजीका लागि अनुरोध गरिएको प्रहरीले जनाएको छ ।