जिल्ला अस्पताल, बाजुरामा एक सातादेखि जीवनजल अभाव भएपछि उपचारका लागि आउने बिरामीहरू स्थानीय मेडिकल स्टोरबाट महँगो मूल्य तिरेर जीवनजल खरिद गर्न बाध्यभएका छन् ।
सरकारले अनिवार्य रूपमा उपलब्ध गराउनु पर्ने औषधि मध्ये जीवनजल समेत बजारबाट किन्नु पर्ने अवस्था सिर्जना भएको सेवाग्राहीहरुको गुनासो छ ।
बडिमालिका नगरपालिका–५ का खेमराज साउदले अस्पतालमा जीवनजल नपाएपछि दुई पटक बजारबाट महँगोमा जीवनजल खरिद गरी प्रयोग गर्न बाध्यभएको गुनासो गर्नु भयो । अस्पतालमा जीवनजल लगायतका निशुल्क रुप पाउने औषधी अभावभएपछि सेवाग्राहीहरुले समस्या भोग्नुपरेको उहाँले बताउनु भयो ।
जिल्ला अस्पतालका सूचना अधिकारी नृप गिरीले मौज्दातमा रहेको जीवनजल सकिएपछि नयाँ खरिद प्रक्रिया सुरु गर्न टेण्डर भइसकेकाले करिब एक महिनाभित्र सेवाग्राहीहरुलाई जीवनजल उपलब्ध गराउने सकिने अपेक्षा गरिएको बताउनु भयो ।
जीवनजल अभाव भएपछि स्वास्थ्य कार्यालय, बाजुराले आपतकालीन रूपमा एक सय पाकेट उपलब्ध गराएको भए पनि बिरामीहरुको अत्याधिक चाँपले गर्दा दुई दिन मै बिरामीहरूलाई वितरण भइसकेको समेत उहाँले बताउनु भयो ।
जीवनजलमा पोटासियम, सोडियमलगायतका आवश्यक तत्व हुने भएकाले झाडापखाला, डेंगु, मलेरिया जस्ता रोगका बिरामीलाई अनिवार्य सेवन गर्नुपर्ने हुन्छ । तर, हाल अभाव देखिएपछि बिरामीहरूले बाहिरै मेडिकलमा महँगो मूल्य तिरेर खरिद गर्नु पर्ने बाध्यता सिर्जना भएको छ । मौसमी बिरामीको सङ्ख्या बढेसँगै अस्पतालमा जीवनजलको माग समेत तीव्र रहेको अस्पतालले जनाएको छ ।