ललितपुर जिल्लाको गोदावरी नगरपालिकाका उपमेयर मुना अधिकारीलाई उनका पति ध्रुव कुँवरले वैशाख १८ गते राति कुटपिट गरी घाइते बनाएपछि प्रहरीकोमा उजुरी गर्न पुगेकी उपमेयर र आरोपितबिच वैशाख १९ गते मिलापत्र भएको छ ।
न्यायिक समिति संयोजक समेत रहेकी अधिकारीका पति ध्रुव कुँवरले वैशाख १८ गते राती घरायसी विवादमा कुटपिट गरेका थिए ।
महानगरीय प्रहरी वृत्त सातदोबाटोका इन्स्पेक्टर सुन्दर चौलागार्इँले कुटपिटपछि उपप्रमुखकको आँखामा गम्भीर चोट लागेको र शरीरभरी निलडाम रहेको जानकारी दिए ।
उपचारपछि घर फर्किएकी उपमेयर अधिकारीका पतिलाई प्रहरीले वैशाख १८ गते राति नै नियन्त्रणमा लिएर महानगरीय प्रहरी परिसर जाउलाखेलमा राखिएको थियो ।
उपमेयर अधिकारीले घटना अगाडि नबढाउने भनेपछि प्रहरी नियन्त्रणमा रहेका ध्रुव कुँवरलाई प्रहरीले छाडेको महानगरीय प्रहरी परिसर जाउलाखेल महिला तथा बालबालिका सेवा केन्द्रकी इन्स्पेक्टर चञ्चला श्रेष्ठले बताइन् ।