जेनजी आन्दोलनसँगै ०८२ भदौ २७ गते गठन भएको सरकारले ०८२ फागुन २१ गते निर्वाचन मिति घोषणा गरेसँगै निर्वाचनको तयारी थालिएको छ ।
निर्वाचन आयोगले कार्त्तिक २ गते झापामा आयोजना गरेको छलफल कार्यक्रममा राजनीतिक दलका प्रतिनिधि , जनप्रतिनिधि र सुरक्षा निकायका प्रमुखहरुले अपायक मतदानस्थल सार्न आग्रह गरेका छन्।
झापाका प्रमुख जिल्ला अधिकारी गोपालकुमार अधिकारीको संयोजकत्वमा भएको छलफलमा कार्यक्रममा राजनीतिक दलका प्रतिनिधि र जनप्रतिनिधिहरुले जिल्लाका केही अपायक मतदान स्थल सार्न आग्रह गरेका हुन् ।
मेचीनगर नगरपालिकाको वडा १० को प्राथमिक स्वास्थ्य केन्द्र धुलावारीमा रहेको मतदान स्थललाई १० नं वडा कार्यालयमा सार्नुपर्ने आग्रह गरिएको छ ।
त्यस्तै गौरादह नगरपालिका ६ का केही मतदाताहरुलाई अपायक पर्ने ठाउँमा मतदान स्थल रहेको भन्दै त्यहाँका वडाध्यक्षले पायक ठाउँमा आग्रह गरेका छन्।
आ–आफ्ना स्थानीय तह र वडामा रहेका मतदान स्थलहरुको अनुगमन गरिदिन जनप्रतिनिधिहरुले आग्रह गरेका हुन् ।
निर्वाचन आयोगले ०८२ कात्तिक १२ गतेदेखि जिल्लाका मतदान स्थलहरुको अनुगमन गर्ने कार्यक्रम तय गरेको छ ।
जिल्ला निर्वाचन अधिकारी तुलसी नेपालले जिल्लामा २ सय ८५ ओटा मतदानस्थल रहेको र प्राप्त सुझावका आधारमा मतदानस्थल सार्ने निर्णय गरिने बताउनु भएको छ।
कोशी प्रदेश कार्यालय