आगामी फागुन २१ गते हुने प्रतिनिधि सभा निर्वाचनमा उम्मेदवारी दर्ता गराएका प्रत्यक्ष तर्फका उमेद्वारहरुले निर्वाचन खर्च सम्बन्धी आचरण उल्लंघन गरेको भन्दै समाजिक सञ्जालमा र नागरिकहरुबाट आलोचना भएको छ ।
निर्वाचन आचारसंहिता २०८२ को परिच्छेद ३ दफा १६ को (ख) मा उल्लेख भएअनुसार उम्मेदवारले निर्वाचन सम्बन्धी खर्च गर्दा बैंक वा बित्तिय संस्थामा छुट्टै खाता खोली सोही खाताबाट गर्नुपर्ने छ । त्यसैगरि सोही दफाको (ङ) मा राजनितिक दलले निर्वाचन सम्वन्धी खर्च गर्दा बैंक वा बित्तिय संस्थामा छुट्टै खाता खोली दलले तोकेको जिम्मेवार पदाधिकारीद्वारा सो खाताबाट खर्च गर्नु पर्ने उल्लेख छ ।
तर जिल्लाका दुई ओटा निर्वाचन क्षेत्रका ३६ जना उम्मेदवार मध्ये चार जना उम्मेदवारले मात्र बैंक खाताको विवरण बुझाएको बित्तिय अनुगमन समितिका संयोजक कोष नियन्त्रक प्रमुख देवराज लुइटेलले बताउनु भयो । लुइटेलका अनुसार निर्वाचनमा भाग लिने उम्मेदवारहरुले निर्वाचनको खर्च बैंकबाट गर्नुपर्ने र उक्त बिवरण निर्वाचन अधिकृतको कार्यालयमा पेश गर्नुपर्ने प्रावधान रहेको छ । उक्त प्रावधानलाई चार जना उम्मेदवार बाहेक बाँकी सबै उम्मेदवारहरुले निर्वाचन खर्च सम्वन्धी आचरण उल्लङ्घन गरेको बताउनु भयो ।