अनौपचारिक क्षेत्र सेवा केन्द्र (इन्सेक) ले असार ११ गते विदुरमा नेपाल मानव अधिकार वर्षपुस्तक प्रकाशन पूर्व अर्धवार्षिक समीक्षा कार्यक्रम सम्पन्न गरेको छ ।
कार्यक्रममा जिल्ला न्यायाधीश ऋषिकेश वाग्लेले अदालतले मानव अधिकार संरक्षणको लागि खेल्नु पर्ने भूमिका निर्वाह गरिरहेको बताए ।
नागरिकको अधिकारको संरक्षण तथा कानुनी संरक्षणका लागि अदालतको भूमिका महत्वपूर्ण रहेको उल्लेख गर्दै उनले न्याय सम्पादनको कामहरू छिटो छरितो रूपमा गरिने बताए ।
‘प्रक्रिया पुरा गर्दा केही न्याय सम्पादन ढिला भएको पनि हुनसक्छ । छिटो न्याय दिने नाममा गम्भीर नहुँदा अन्याय पनि हुनसक्छ । त्यसैले न्याय सम्पादनमा गम्भीर हुनुपर्छ’-उनले भने ।
जिल्ला प्रहरी कार्यालयका इन्स्पेक्टर राजाराम खड्काले प्रहरी मानव अधिकार संरक्षणमा लागिरहेको बताउँदै हिरासतमा समेत कुनै गम्भीर घटना नहोस् र भई हालेमा को दोषी हो भनी थाहा पाउनका लागि सीसी क्यामेरा जडान गरिएको जानकारी दिए । अहिले प्रहरी हिरासतमा, बयानका क्रममा यातना दिने जस्ता कार्य बन्द भएको उनले बताए ।
जिल्ला बार एशोसिएशनका अध्यक्ष देवराज कँडेलले प्रहरी, अदालत र प्रशासन जस्ता निकायमा परेका मुद्दा, उजुरीको मात्र नभई सामाजिक रूपमा भइरहेका मानव अधिकार उल्लङ्घनका घटनाहरूको पनि खोजी गर्नु पर्ने बताए ।
कार्यक्रममा इन्सेक जिल्ला प्रतिनिधि नवदीप श्रेष्ठले ६ महिनाको अवधिमा जिल्लामा अभिलेख गरिएका १९ ओटा मानव अधिकार उल्लङ्घन तथा ज्यादतीका घटनाहरू प्रस्तुत गरेका थिए । अभिलेखित घटना अनुसार हत्याका चार, बलात्कारका आठ, बलात्कार प्रयासका पाँच, बहुविवाहको एउटालगायतका रहेका छन् ।
नवदीप श्रेष्ठ