अनौपचारिक क्षेत्र सेवा केन्द्र (इन्सेक) काठमाडौँ कार्यालयको आयोजनामा जेठ २२ गते काभ्रेको धुलिखेलमा मानव अधिकार उल्लङ्घन तथा ज्यादती पीडितहरूको अधिकार प्रवर्धन कार्यक्रमको अर्धवार्षिक समीक्षा कार्यक्रम सम्पन्न गरिएको छ ।
कार्यक्रममा इन्सेक काठमाडौँ कार्यालयका संयोजक कृष्ण गौतमले इन्सेककर्मी सरकारको प्रतिस्पर्धी नभएर सहयोगी भएकाले मानव अधिकार संरक्षण तथा सम्बर्द्धनमा कार्य गर्नुपर्ने बताए । स्थानीय तहको निर्वाचन भइसकेको र अब स्थानीय तहमै सरोकारवाला निकायका प्रतिनिधि रहेकाले काम गर्न सजिलो भएको उनको भनाई छ ।
दिगोविकास लक्ष्य पुरा गर्न र सहस्राब्दी विकास लक्ष्य पुरा गर्नका लागि इन्सेककर्मीले महत्वपूर्ण् योगदान पुर्याउनुपर्नेमा उनको जोड छ ।
मानव अधिकार पैरवी कार्यक्रमकी प्रमुख सम्झा श्रेष्ठले संस्थाको कार्यक्रमहरूले ल्याएको परिवर्तनको अभिलेख गर्न जिल्ला प्रतिनिधि र सहजकर्ताहरूलाई सुझाव दिइन् । स्थानीय तहसँगको समन्वय र सहकार्यमा गरिने कार्यक्रमको उपलब्धि र चुनौतिका विषयमा समीक्षा गरेर स्थानीय तहमा मानव अधिकार अभियानलाई प्रभावकारी बनाउनु पर्नेमा उनले जोड दिइन् ।
पिएमइ अधिकृत सुवेक्षा खड्काले मानव अधिकार अभियानलाई स्थानीय स्तरबाटै बलियो बनाउनु पर्नेमा जोड दिइन् । इन्सेकले गर्ने कार्यक्रमले धेरै उपलब्धिहरू हासिल गरिएकोले उक्त उपलब्धि प्रतिवेदनमा उल्लेख गरी पठाउन सुझाव दिइन् ।
लेखा अधिकृत भार्गव काफ्लेले कार्यक्रम सञ्चालनका बखत आर्थिक शुसासन कायम गर्न र आर्थिक मितव्ययितता अपनाउन सुझाव दिए ।
इन्सेक कार्यालय काठमाडौँका कार्यक्रम फोकल पर्सन गणेश भण्डारी र प्रलेख अधिकृत राजु पासवानले समन्वय र सहकार्यमा कार्यक्रम सञ्चालन गरी कार्यक्रमको उपलब्धिहरूको दस्तावेज र सिकाइ उपलब्धिहरू दुरूस्त राख्न आग्रह गरे ।
कार्यक्रममा धनुषा, बारा, पर्सा, दोलखा, धादिङ र सिन्धुपाल्चोक जिल्लाका जिल्ला प्रतिनिधि र सहजकर्ताले ६ महिनामा सम्पन्न गरेका क्रियाकलाप र उपलब्धिका बारेमा प्रस्तुतीकरण गरेका थिए ।
सीताराम अधिकारी