‘झुलाघाट चिवाभञ्ज्याङ समृद्धिका लागि संकल्प यात्रा” मा अवरोध गरेको आरोपमा प्रहरीले प्रदेश नं.१ पुनः नामाङकन संयुक्त सङ्घर्ष समितिका तीन जना कार्यकर्तालाई मङ्सिर २६ गते गिरफ्तार गरेको छ ।
पहिचान पक्षधरले नेकपा एमालेको ‘झुलाघाट चिवाभञ्ज्याङ समृद्धिका लागि सङ्कल्प यात्रा” अवरोधका लागि ०८० मङ्सिर २६ गते जिल्ला बन्दको आह्वान गरेको छ ।
बन्दका कारण जिल्लामा जनजीवन प्रभावित भएको छ । प्रहरीले यातायात बन्दलाई सफल बनाउँदै हिडेका राजेश राई, गन्धमान राई र विजय राईलाई हलेसीबाट गिरफ्तार गरेको हो ।
गिरफ्तारीमा परेका पहिचान पक्षधरहरूलाई तत्काल रिहा गर्न पहिचानवादी युवा परिचालन समिति संयोजक निर्मल राईले माग गर्नु भएको छ ।
पहिचानवादीलाई तुरुन्त रिहाई गर्न देशभक्त समाजवादी मोर्चाका संयोजक तथा संयुक्त संघर्ष समिति केन्द्रीय घटक समूहको नेतृत्वकर्ता गोपाल किरातीले माग गर्नु भएको छ ।
प्रदेश नं.१ पुनः नामाङकन संयुक्त संघर्ष समितिले मङ्सिर २६ गते उदयपुरको घुर्मीबजारदेखि भोजपुरको लेगुवाघाटसम्म अनिश्चितकालीन यातायात बन्द घोषणा गरेको छ ।
बन्दकर्ताहरूले ठाउँ-ठाउँमा टायर बालेको प्रहरीले जनाएको छ । जिल्लाका नुनथला, नाँगी, कदुवा र छापडाँडामा रुख ढालेर सडक अवरोध गरिएको प्रहरीले जनाएको छ ।
दिक्तेल रूपाकोट मझुवागढी नगरपालिका-९ निर्मलीडाँडाको लामाखुमा मङ्सिर २६ गते बिहान शङ्कास्पद वस्तु फेला परेको प्रहरीले जनाएको छ ।
शङ्कास्पद वस्तुलाई नेपाली सेनाबाट डिस्पोज गरिएको जिल्ला प्रहरी कार्यालयका इन्स्पेक्टर बेनु कार्कीले बताउनु भयो ।
‘झुलाघाट चिवाभञ्ज्याङ समृद्धिका लागि संकल्प यात्रा’ अभियानका क्रममा नेकपा एमाले अध्यक्ष एवम् पूर्वप्रधानमन्त्री केपी शर्मा ओली मङ्सिर २६ गते ओखलढुङ्गाको हर्कपुर आउने भएपछि पहिचानवादीहरूले विरोध गर्ने जनाएका छन् ।
एमाले अध्यक्ष केपी शर्मा ओलीले पहिचानको आन्दोलनविरूद्ध अभिव्यक्ति दिएकाले हर्कपुर आउनमा अवरोध गर्ने र खोटाङ छिर्न नदिने ०८० मङ्सिर २१ गते दिक्तेलमा पत्रकार सम्मलेन गरेर पहिचान पक्षधरले जानकारी दिइसकेको छ ।
