महिला तथा बालबालिका बेचबिखनविरुद्ध सहकर्मी समूह नेपाल (एट्वीन) को सातौँ अधिवेशन तथा १४ औँ साधारणसभा एवम् २० औँ वार्षिकोत्सव साउन २७ गते काठमाडौँमा सम्पन्न भएको छ ।
एट्विनको सातौँ अधिवेशनले हिमराईटकी अञ्जना शाक्यको अध्यक्षतामा आगामी २ वर्षका लागि नौ सदस्यीय कार्यसमिति चयन गरेको छ ।
कार्यसमितिको उपाध्यक्षमा ग्रामीण महिला सृजनशील परिवार, सिन्धुपाल्चोककी नानी माया थापा, महासचिवमा इन्सेककी सम्झा श्रेष्ठ, सचिवमा शक्ति समूहकी बालकुमारी राना र कोषाध्यक्षमा डब्लु डिएकइटिसिकी शान्ता खनाल चयन भएका छन् ।
त्यसैगरी सदस्यहरूमा चाइल्ड सोसाइटी नेपालकी सीता पौडेल, केआई नेपालका इन्द्रराम भट्टराई, विश्वास नेपालकी तारा भण्डारी र ओफोनकी छलिमाया मगर चयन भएको एट्वीनकी महासचिव सम्झा श्रेष्ठले जानकारी दिइन् ।
सो अवसरमा “बेचबिखनविरुद्ध एट्वीनको २० वर्ष नामक पुस्तकको विमोचन गरिएको छ । राष्ट्रिय मानव अधिकार आयोगका अध्यक्ष अनुपराज शर्माले मानव अधिकारकाविरुद्ध कलङ्कको रूपमा रहेको मानव बेचबिखन जस्तो जघन्य अपराधलाई निर्मूल गर्न सबैको सहयोग चाहिने बताए ।
इन्सेकका अध्यक्ष सुबोधराज प्याकुरेलले मानव बेचबिखनका आयामहरूका बारेमा उल्लेख गर्दै यो अपराध आन्तरिक विस्थापनको अवस्थामा समेत रहने गरेको उल्लेख गरे ।
सो अवसरमा मानव बेचबिखनविरुद्ध कार्यरत संस्थाहरू र एट्वीनका संस्थापक संस्थाहरूलाई सम्मान गरी मायाको चिनो प्रदान गरिएको थियो । संस्थापक संस्थाका रूपमा अनौपचारिक क्षेत्र सेवा केन्द (इन्सेक) लाई पनि सम्मान तथा मायाँको चिनो प्रदान गरिएको थियो ।
कार्यक्रममा बेचबिखनबाट प्रभावितहरूको अधिकारको क्षेत्रमा कार्यरत संस्था शक्ति समूहकी चरीमाया तामाङ, सुनिता दनुवार र एट्वीन अभियन्ता एवम् मेलम्ची नगरपालिका सिन्धुपाल्चोककी उपमेयर भगवती नेपाललाई अभिनन्दन गरिएको थियो ।