अनलाइन जुम बैठकमा महिला कर्मचारीलाई दुर्व्यवहार गरेको आरोपमा चितवन कृषि तथा वन विज्ञान विश्वविद्यालयको कृषि सङ्कायका डीन प्रा. जयप्रकाश दत्तलाई विश्वविद्यालयले ०७९ चैत २ गते निलम्बन गरेको छ ।
जुम बैठकमा दत्तले महिला कर्मचारीलाई दुर्व्यवहार गरेको भिडियो सार्वजनिक भएपछि निलम्बन गरिएको कृषि तथा वन विज्ञान विश्वविद्यालयका उपकुलपति पुण्य रेग्मीले जानकारी दिनुभयो ।
सामाजिक सञ्जालमा देखिएको विषयवस्तु सम्वेदनशील देखिएको हुँदा सत्यतथ्य छानविनका लागि समिति गठन गरिएको र छानविन समितिको प्रतिवेदन प्राप्त भई निर्णय नहुञ्जेलसम्मका लागि दत्त निलम्बनमा रहने रेग्मीले बताउनु भयो ।
उक्त बैठकमा कृषि सङ्कायका ६३ जनाभन्दा बढी सहभागी थिए । डीन दत्तले अडियो म्यूट गरे पनि भिडियो अन नै भएको रेग्मीले बताउनु भयो ।
डीन दत्त कृषि सङ्कायको डीनको चार वर्षे पहिलो कार्यकाल पूरा गरेर थप चार वर्ष दोस्रो कार्यकालका लागि ०७७ कात्तिकमा डीन नियुक्त भएका थिए ।