कमला नपा–७ स्थायी घर भई जनकपुरधाम उपमहानगरपालिका–१९ बस्ने १८ वर्षीय मुकेश मुखियालाई अपरिचित व्यक्तिहरूको समूहले फागुन २१ गते राति गोली प्रहार गर्दा घाइते भएको प्रहरीले जनाएको छ ।
पीडितका मामा भोगी मुखियाले सञ्चालन गरेको किराना पसलमा बसेर कुराकानी गरिरहेको अवस्थामा अपरिचित व्यक्तिहरूको समूहले प्रहार गरेको गोली मुकेश मुखियाको घाँटीमा लागेको छ ।
घाइते मुखियालाई जनकपुरको प्रादेशिक अस्पतालमा प्राथमिक उपचार गरी थप उपचारको लागि काठमाडौँ पठाइएको अस्पतालका प्रमुख डा. प्रमोद यादवले बताउनु भयो ।
घटना लगत्तै जिल्ला प्रहरी कार्यालय धनुषाबाट खटेको प्रहरीको टोलीले अनुसन्धान गरिरहेको धनुषाका एसपी बसन्त रजौरेले बताउनु भयो ।
धनुषाका डिएसपी जितेन्द्रकुमार बस्नेतलगायतको टोलीले अनुसन्धानको क्रममा गोली प्रहारको गरेको आशङ्कामा चार जनालाई फागुन २२ गते बिहान गिरफ्तार गरेको छ ।
अनुसन्धानकै क्रममा रहेकाले गिरफतार परेकाहरूको पहिचान गोप्य राखिएको धनुषाका डिएसपी जितेन्द्रकुमार बस्नेतले बताउनु भयो ।
प्रहरीले घटनास्थलबाट पेस्तोल र गोलीको खोका बरामद गरेको जनाएको छ ।