सुर्खेतको वीरेन्द्र चोकमा स्वर्गीय राजा वीरेन्द्रको सालिक राखेको सन्दर्भमा लेखिएको समाचारको विषयमा रातोपाटी अनलाइन कर्णाली प्रदेश प्रतिनिधि पङ्खबहादुर शाहीलाई मार्ने धम्की दिइएको छ ।
अनलाइनमा पुस १५ गते प्रकाशित ‘छापामार शैलीमा वीरेन्द्रको सालिक ठड्याएपछि’ राजकुमार शाही, भरत शाही ठकुरी र टिकजङ्ग शाहीले पत्रकार शाहीलाई सामाजिक सञ्जालमार्फत डर, धम्की र अपशब्द प्रयोग गर्दै मार्ने धम्की दिएको पत्रकार शाहीेले इन्सेक प्रतिनिधिलाई बताउनुभयो ।
पीडित पत्रकार शाहीले आफूलाई गाली गलौज तथा मार्ने धम्की दिएकाले सुरक्षाको माग गर्दै आरोपितलाई कारबाहीको माग गर्दै पुस १८ गते जिल्ला प्रहरी कार्यालयमा उजुरी समेत दिएको बताउनुभयो ।
जिल्ला प्रहरी कार्यालयका इन्स्पेक्टर कनक शाहीले पुस २५ गतेसम्म दुवै पक्षलाई बोलाएर छलफल गराउने जानकारी दिनुभयो ।
प्रकाशित समाचारमा सहमति भए वा चित्त नबुझे खण्डन गर्ने र त्यसबिरूद्ध कानूनी उपचार खोज्ने प्रावधान हुँदा हुँदै समाचार लेखेकै भरमा मार्ने धम्की दिइएको प्रति नेपाल पत्रकार महासंघ सुर्खेतले पुस १७ गते विज्ञप्ति जारी गर्दै घटनामा संलग्नलाई कारबाहीका लागि माग गरेको छ ।
‘स्वतन्त्रता पूर्वक, भय रहित र सुरक्षित रूपमा कलम चलाउने वातावरणमाथि कुनै पनि आँच आउने गतिविधि नगर्न महासंघको आग्रह छ’ विज्ञप्तिमा भनिएको छ ।
