बलान बिहुल गाउँपालिका–४ बेल्ही की १६ वर्षीया सरिताकुमारी बडहीको हत्या गरेको कसुरमा ४५ वर्षीय बाबु तुरन्तलाल बडहीलाई जिल्ला अदालतले वैशाख १४ गते जन्मकैद सजायको फैसला गरेको छ ।
न्यायाधीश रिताकुमारी बख्रेलको इजलासले जन्मकैद सजायको फैसला गरेको अदालतका सूचना अधिकारी हेमबहादुर बुढाथोकीले बताउनु भयो ।
बुढाथोकीका अनुसार घटनालगत्तै फरार रहेकी मृतककी ४३ वर्षीया आमा पवनदेवी बडहीको हकमा मुद्दा मुल्तबीमा राखिएको छ ।
बलान बिहुल गाउँपालिका–४ बेल्ही की १६ वर्षीया सरिताकुमारी बडहीको ०७५ माघ १४ गते हत्या भएको आरोपमा प्रहरीले तुरन्तलाललाई माघ १५ गते गिरफ्तार गरेको थियो ।
मृतकको अर्धनग्न शव चोटपटक लागेको अवस्थामा घरमा भेटिएपछि इलाका प्रहरी कार्यालय कडरबोनाले तुरुन्तलाललाई गिरफ्तार गरेको थियो ।
आमाबुबा नै आरोपित रहेको शङ्का पश्चात घटनास्थलको अनुसन्धानपछि प्रहरी प्रतिवेदनको आधारमा ०७५ माघ १६ गते इलाका प्रहरी कार्यालय कडरबोनाले उजुरी दर्ता गरेको थियो ।
भित्रबाट चुकुल नलागेको कोठाको भित्ता छेउमा खाटमुनि लडेको शव अर्धनग्न अवस्थामा रहेको र मृतकको शरीरको केही अङ्गमा चोटपटकको निलडाम समेत देखिएकाले प्रहरी प्रतिवेदनका आधारमा उजुरी दर्ता गरिएको इन्स्पेक्टर सुरेन्द्रकुमार श्रेष्ठले बताउनु भयो ।
भारतमा विवाहिता दिदीका देवरसँग प्रेम गरिरहेकी सरीताले घरपरिवारले मञ्जुरी नदिए पनि प्रेमीसँगै विवाह गर्ने अडान लिएपछि बुबाआमाले सरीतालाई कुटपिट गरेको स्वीकार गरे पनि हत्या गरेको अस्वीकार गर्दै आएका थिए ।
शवको पोष्टमार्टम धरानस्थित विपी कोइराला स्वास्थ्य विज्ञान प्रतिष्ठानमा ०७५ माघ १६ गते गरिएको थियो ।
जिल्ला अदालतको आदेशमा आरोपित तुरन्तलाल ०७५ फागुन ११ गतेदेखि पुर्पक्षका लागि राजविराज कारागारमा थुनामा रहेको प्रहरीले जनाएको छ ।