छिन्नमस्ता गाउँपालिका–५ लोखरमकी मालतीकुमारी सदासँग बोदे बर्साइन नपा–५ सिलहटका श्रवण सदाबीच फागुन २९ गते भइरहेको विवाह बेहुली कालो वर्ण भएको भन्दै स्थगित भएको छ ।
स्वयम्बर भएपछि श्रवणले एक्कासी केटी मन नपरेकोले विवाह नगर्ने भन्दै मण्डपबाट भागेपछि विवाह स्थगित भएको स्थानीय जयप्रकाश ठकुरले बताउनु भयो । दुबै पक्षका अभिभावकले एक अर्काको घर गई श्रवण र मालतीलाई हेरेर विवाहको कुरा छिनेका थिए । श्रवणले भने बुवा शम्भुले मन पराएको युवतीसँगै विवाह गर्ने भनी मालतीको फोटो मात्र हेरेका थिए ।
विवाहको लागि पूर्वसहमतिअनुसार फागुन २९ गते साँझ जन्तीसहित बेहुला लोखरमस्थित बेहुलीको घर पुगे । विवाहको सम्पूर्ण तयारी अनुसार बेहुली पक्षले भोज खाए । जन्तीका लागि खाना पकाइएको थियो । बेहुलीको घरमा एक सातादेखि उनका आफन्त, नातागोता र छरछिमेकहरूको बाक्लो उपस्थिती थियो ।
स्वयम्बर पछि जन्ती नास्ता खान थाले । बेहुलाले भने आफूले सोचे जस्तो राम्री बेहुली नभएकाले विवाह गरेर घर नभित्र्याउने घोषणा गरे । श्रवणका बुवा शम्भु सदाका अनुसार सुरुमा बुवाले हेरेको युवतीसँग विहे गर्ने भन्यो, अहिले कालो वर्णकी बेहुली भएकाले मन परेन भन्यो । विवाहको लागि सम्पूर्ण तयारी गरिए पनि अन्तिम घडीमा बेहुलाले विवाह गर्न अस्विकार गरे पछि बेलुही पक्ष ८० हजार रुपियाँको आर्थिक मारमा परेको बेहुलीका बुवा महेन्द्र सदाले बताउनु भयो ।
गरिब, दलित र कमजोर आर्थिक अवस्था भएका महेन्द्रले छोरीको विवाहका लागि ब्याजमा ऋण लिएर सबै तयारी गर्नु भएको थियो । विवाह रोकिएपछि आर्थिक मारमा पर्नुका साथै स्वयम्बर भइसकेकी युवतीको अर्को विवाह गर्न धेरै दाइजो दिनु पर्ने महेन्द्रले बताउनु भयो ।
वर्ण र रङ्गकै कारण विवाह गर्न अस्विकार गरी फरार हुने युवकलाई कारवाही गर्नुपर्ने भन्दै गाउँलेहरुले बेहुलाका बुवालाई नियन्त्रणमा लिई इलाका प्रहरी कार्यालय सखडाको जिम्मा लगाएको छ । इलाका प्रहरी कार्यालय सखडाले आवश्यक कारवाहीका लागि शम्भुलाई चैत १ गते जिल्ला प्रहरी कार्यालय पठाएको छ । सप्तरीका प्रहरी प्रमुख एसपी कृष्ण प्रसाईले वर्णकै आधारमा विवाह गर्न अस्विकार गरी विवाहस्थलबाट फरार हुने युवकलाई कानुन बमोजिम के–कस्तो कारवाही हुनेबारे जिल्ला सरकारी वकिल कार्यालयसँग छलफल भइरहेको बताउनु भयो ।
वर्णकै कारण विवाह गर्न अस्विकार गर्ने केटासँग जबरजस्ती विवाह गरेर सुखी जीवन नहुने भन्दै बेहुली मालतीले स्वयम्बर समेत भइसकेपछि विवाह नगर्नेलाई कारवाही हुनुपर्ने माग गर्नुभयो ।