डाकनेश्वरी नगरपालिकाका नगर प्रमुख ६८ वर्षीय शिवनारायण साहमाथि दुर्व्यवहार गरेको आरोपमा सप्तरी प्रहरीले डाक्नेश्वरी नपा–३ का ४० वर्षीय राजीवकुमार राय, डाक्नेश्वरी नपा–५ का ३२ वर्षीय अमरेन्द्रकुमार यादव र डाक्नेश्वरी नपा–७ का २६ वर्षीय अर्जुनकुमार यादवलाई माघ २३ गते गिरफ्तार गरेको छ ।
घटना लगत्तै गिरफ्तार तीन जनासहित डाक्नेश्वरी नपा–५ का ४५ वर्षीय महेश्वरप्रसाद यादव र डाक्नेश्वरी नपा–७ का ३० वर्षीय गजेन्द्रप्रसाद साहविरुद्ध नगर प्रमुख साहले माघ २२ गते जिल्ला प्रहरी कार्यालयमा गाली बेइज्जतीको उजुरी दिनु भएको छ ।
अन्य आरोपितहरूको खोजी भइरहेको जिल्ला प्रहरी कार्यालय सप्तरीका डिएसपी तिलक भारतीले बताउनु भएको छ ।
डाक्नेश्वरी नपा–५ पातोस्थित माध्यमिक विद्यालयमा आयोजित एक कार्यक्रममा सहभागी हुन कर्मचारीहरूसहित गाडीमा गइरहेका बेला माघ २१ गते आरापितहरूले दुर्व्यवहार गर्दै कर्मचारीहरूमाथि हातपात गरेको नगर प्रमुख साहले बताउनु भयो । गाडीलाई चारै तिरबाट मोटरसाइकलले घेराउ गरी ज्ञापन–पत्र दिनु छ अहिले कार्यालय हिँड भन्दै घिस्याउन खोजेपछि कर्मचारीहरूले रोक्न खोज्दा उनीहरूमाथि नै हातपात भएको प्रमुख साहले बताउनु भयो ।
नगर प्रमुख साहमाथि भएको हातपातको विरोधमा माघ २३ गते जिल्लाका १८ ओटै स्थानीय तह बन्द गरिएको छ । नगर प्रमुख साहमाथि भएको आक्रमणको विरोध गर्दै राजविराजस्थित जिल्ला समन्वय समिति सप्तरीमा बसेको बैठकले जिल्लाका सबै स्थानीय तह बन्द गर्ने निर्णय गरेपछि सप्तरीको नौ नगरपालिका र नौ गाउँपालिकाको सेवा बन्द भएका छन् ।
आर्थिक अनियमितताको विरोध गर्दै गत मङ्सिर २९ गतेदेखि स्थानीय युवाहरूले डाक्नेश्वरी नगरपालिका कार्यालयमा ताला लगाएर गरेको आन्दोलन गत पुस १२ गते २२ बुँदे सहमतिपछि खुला भएको थियो । नगर प्रमुख साहमाथि भएको घटनामा आन्दोलनमा संलग्न रहेका युवाहरू रहेको बताइएको छ ।