नेत्रविक्रम चन्द ‘विप्लव’ नेतृत्वको नेकपाका सप्तरी जिल्ला इञ्चार्ज छिन्नमस्ता गाउँपालिका–१ का ४० वर्षीय तेजनारायण यादव, कञ्चनरुप नपा–६ का ५२ वर्षीय नुन्नु राम र शम्भुनाथ नपा–६ का ४६ वर्षीय गणपति साहलाई प्रहरीले चैत १२ गते गिरफ्तार गरेको छ ।
यादव जिल्ला इञ्चार्ज रहेको र अन्य दुई जना जिल्ला सदस्य रहेको बताइएको छ । उनीहरु घरबाटै गिरफ्तार भएको सप्तरी प्रहरीले जनाएको छ ।
प्रहरीले विप्लव नेतृत्वको नेकपामा संलग्न रहेको आरोपमा अन्य व्यक्तिहरुलाई पनि गिरफ्तार गरेर अनुसन्धान गरिरहेको छ ।
गिरफ्तार भएकामध्ये साह आफ्नो पार्टीको सक्रिय कार्यकर्ता रहेको नेकपाका केन्द्रीय सदस्य एवम् संविधान सभाका निवर्तमान सदस्य अशोक मण्डल अमरले दावी गरेका छन् ।
तत्कालिन एमाओवादीको जिल्ला सदस्य रहेका साह हालसम्म पनि नेकपा (नेकपा)को हरेक कार्यक्रममा क्रियाशीलता पूर्वक खटिरहेको र विप्लव समूहको कुनै गतिविधिमा नरहेको मण्डलले बताए ।
गिरफ्तार तीनै जनालाई जिल्ला प्रहरी कार्यालय सप्तरीमा नियन्त्रणमा राखी अनुसन्धान भइरहेको जिल्ला प्रहरी कार्यालयका एसपी राजेन्द्र विष्टले बताए ।