४५ वर्षीया महिलालाई बलात्कार प्रयास गरेको आरोपमा प्रहरीले बोदे बर्साइन नपा–९ का ६० वर्षीय लक्ष्मण महतोविरुद्ध चैत १० गते उजुरी दर्ता गरेको छ ।
घरमा एक्लै सुतिरहेका बेला फागुन २९ गते राति आएका आरोपितले बलात्कार प्रयास गरेको भन्दै पीडितले चैत ५ गते इलाका प्रहरी कार्यालय कल्याणपुरमा उजुरी दिएकी थिइन् ।
पीडितका पति काठमाडौंमा रोजगारी गर्छन् भने १० वर्षीय छोरा बोडर्समा बसेर अध्ययन गरिरहेका छन् । घरमा रहेकी दुई छोरी पनि टोल छिमेकमा भएको विवाहमा गएका बेला पीडित घरमा एक्लै रहेको मौका पारी आएका आरोपितले हातपात गरी कपडा च्याती बलात्कार प्रयास गरेको पीडितले बताइन् ।
पीडितको स्वास्थ्य परिक्षण राजविराजस्थित गजेन्द्रनारायण सिंह सगरमाथा अस्पतालमा चैत ६ गते गरिएको छ । इलाका प्रहरी कार्यालय कल्याणपुरका इन्स्पेक्टर बिष्णुप्रदिप बस्यालका अनुसार आरोपितलाई चैत ६ गते गिरफ्तार गरिएकोमा चैत ७ देखि ९ गतेसम्म सार्वजनिक बिदा भई सरकारी कार्यालयहरु बन्द रहेकोले चैत १० गते उजुरी दर्ता गरी म्याद थप गरिएको हो ।