राष्ट्रिय पुनःनिर्माण प्राधिकरणले भूकम्प प्रभावित जिल्लामा जग्गासम्बन्धी प्रमाणको अभावले अनुदान सम्झौता हुन नसकेका लाभग्राहीका लागी पनि आवश्यक व्यवस्था मिलाउन पहल गर्ने निर्णय गरेको राससले जनाएको छ ।
प्राधिकरणका प्रमुख कार्यकारी अधिकृत प्राडा गोविन्दराज पोखरेलको संयोजकत्वमा चैत २२ गते बसेको कार्यकारी समिति बैठकले लालपूर्जालगायत जग्गासम्बन्धी प्रमाणको अभावमा अनुदान सम्झौता हुन नसकेका लाभग्राहीको समस्या सम्बोधन गर्न समिति गठन गरेको छ ।
बैठकले सो सम्बन्धमा के कस्तो नीतिगत व्यवस्था गर्न सकिन्छ भन्ने सुझाव दिन कार्यकारी समिति सदस्य धुव्रप्रसाद शर्माको संयोजकत्वमा समिति गठन गरेको प्राधिकरणले जनाएको छ ।
समितिले एक साताभित्रमा त्यस्ता लाभग्राहीको हकमा कस्तो व्यवस्था गर्न सकिन्छ भनी निर्क्योल गरी कार्यकारी समितिलाई सुझावसहितको प्रतिवेदन पेस गर्नेछ । भूकम्प प्रभावित १४ जिल्लामा पहिचान भएका ६ लाख ३६ हजार ३६ घरधुरी लाभग्राहीमध्ये ५ लाख ४८ हजार २ सय ५५ लाभग्राहीसँग मात्र निजी आवास निर्माणका लागि अनुदान सम्झौता भएको थियो ।
लालपूर्जा नभएका तथा जग्गासम्बन्धी प्रमाणको अभावमा पहिचान भएपनि ७७ हजार ७८१ लाभग्राहीसँग निजी आवास निर्माणका लागि अनुदान सम्झौता हुन सकेको छैन ।