फागुन २१ गते हुने प्रतिनिधिसभा सदस्य निर्वाचन विरुद्ध गतिविधि गरेको आरोपमा प्रहरीले ७६ जनालाई गिरफ्तार गरी प्रहरी हिरासतमा राखेको छ ।
राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईंसहित ६ ओटा समूह अहिले निर्वाचन बिथोल्न सक्रिय रहेको प्रहरीको विश्लेषण छ । प्रसाईं सहित निर्वाचन बिथोल्ने गतिविधिमा संलग्न ७६ जनालाई गिरफ्तार गरिएको प्रहरी प्रवक्ता (डीआईजी) अविनारायण काफ्लेले बताए ।
प्रहरीले निर्वाचन विरोधी गतिविधिमा संलग्न १ सय ४२ जनालाई गिरफ्तार गरिएकोमा अदालतको आदेशले ६६ जना रिहा भइसकेका छन् । फागुन १८ गते नौ जनालाई गिरफ्तार गरिएको डीआईजी काफ्लेले बताए ।
प्रसाईं समूह, धर्मेन्द्र बास्तोला नेतृत्वको नेपाल कम्युनिस्ट पार्टी (बहुमत), आहुति नेतृत्वको वैज्ञानिक समाजवादी पार्टी, मङ्गोल नेशनल अर्गनाइजेशन र पहिचानको आन्दोलनमा सक्रिय समूहले निर्वाचन विरोधी गतिविधि गरिरहेको प्रहरीको विश्लेषण छ । बहुमतका महासचिव धर्मेन्द्र बास्तोला गिरफ्तार पछि रिहा भइसकेका छन् ।