जनमतहरू

केही दिनदेखि रुपन्देही जिल्लाका विभिन्न ठाउँमा भएको आगलागीका कारण ठूलो धनजनको क्षति भयो । धेरै नागरिकहरू घरवार विहीन भए । आगलागीका कारण धेरैको खाना, छाना र नाना खोसियो ।  आगलागी पीडितको पीडामा मलम लगाउनका लागि स्थानीय सरकार कत्तिको प्रतिबद्ध रहेका छन् ? स्थानीय सरकार नागरिकको सबैभन्दा नजिकको सरकार भएकोले नागरिकहरूको पीडामा मलम लगाउन के कस्ता कार्यहरू भएका छन् ? यसै सन्दर्भमा रुपन्देही जिल्लाका आगलागीबाट प्रभावित केही स्थानीय तहहरूका प्रमुखहरूसँग इन्सेक रुपन्देही जिल्ला प्रतिनिधि रीमा बीसीले तयार पार्नु भएको जनमत ।

 

विद्या प्रसाद यादव

अध्यक्ष, रोहिणी गाउँपालिका

आगलागीका कारण जिल्लाको रोहिणी गाउँपालिका सबैभन्दा बढी प्रभावित भएको छ । आगलागीका कारण स्थानीय तहमा ९८ ओटा घर जलेर नष्ट भएका छन् । ९८ घरमध्ये ५२ ओटा घर पूर्ण रूपमा जलेर नष्ट भएका छन् भने बाँकी घरमा आंशिक क्षति भएको छ । आगो निभाउनका लागि देवदह नगरपालिकाको दमकल, सिद्धार्थ नगरपालिका र तिलोत्तमा नगरपालिकाको दमकल, जिल्लामा नेपाली सेना, सशस्त्र प्रहरी बल र नेपाल प्रहरीले धेरै सहयोग गरेका कारण आगो निभाउन सम्भव भएको छ । पीडितहरूलाई सुरक्षित स्थानमा राखिएको छ । आगलागी पीडितलाई स्थानीय व्यक्ति, समुदाय र सङ्घसंस्थाहरूले खाद्यान्न तथा त्रिपालको सहयोग गरेका छन् । पीडित परिवारका लागि जिल्ला प्रशासन कार्यालयको बिपद् राहत कोष मार्फत १५ हजार रुपियाँका दरले ५२ घर परिवारका लागि वितरण गरेको छ । गाउँपालिकाको तर्फबाट प्रत्येक पीडित परिवारका सदस्यहरूलाई जनही ३ हजार रुपियाँका दरले रकम, झुल र त्रिपाल उपलब्ध गराइएको र पूर्ण क्षति भएको घर परिवारका लागि दुई बोरा (५० किलो) चामल, दाल, नुन, तेल थप उपलब्ध गराइएको छ । पीडितहरूलाई सत्यसाई सेवा आश्रम मार्फत पनि केही खाद्यान्न सहयोग भएको थियो । आगलागीबाट रोहिणी गाउँपालिकामा मात्र झण्डै ५ करोड रूपियाँ बराबरको क्षति भएको र बाँकी विवरण संकलन गर्न बाँकी रहेको बताउँदै बिपदको बेलामा पीडितहरूको पीडामा मलम लगाउनका लागि गाउँपालिका प्रतिबद्ध रहेकोले बिपदका बेलामा सहयोग गर्ने सबैलाई धन्यवाद दिन चाहन्छु।

 

विनोद कुमार श्रीवास्तव

अध्यक्ष, सम्मरीमाई गाउँपालिका

आगलागीका कारण सम्मरीमाई गाउँपालिकाका २६ घर जलेर नष्ट भएका छन् । सबैभन्दा बढी क्षति गाउँपालिकाको वडा नं १ मा भएको छ । वडा नं. १ मा मात्र झण्डै १७ लाख रूपियाँ बराबरको क्षति भएको र आगलागीका कारण सबैभन्दा बढी गरिब र सीमान्तकृत समुदायहरू प्रभावित भएका छन् । आगलागीबाट २६ घर पूर्ण रूपमा  जलेर नष्ट भएका छन् भने पशुपंक्षीहरू गोरु, बाख्रा, पाडा, मोटरसाइकल, साइकल, टिभी लगायतका सामग्रीहरू जलेर नष्ट भएका छन् । आगलागी पीडितहरूका लागि प्रहरी प्रशासन, रेडक्रस, गैरसरकारी संस्थाहरू र स्थानीयहरूले पीडा बिर्साउनका लागि सहयोग गरेको भए पनि गाउँपालिकाका प्रमुख प्रशासकीय अधिकृत १६ दिनदेखि कार्यालयमा नहुँदा राहत दिन सकिएको छैन । जिल्ला प्रशासन कार्यालय, रेडक्रस सोसाइटी र एनजिओले राहत सहयोग गरे तर प्रमुख प्रशासकीय अधिकृत नभएको कारण हामीले स्थानीय तह मार्फत सहयोग गर्न सकेनौँ । त्यसकारण अधिक दुःख लागेको छ । कार्यपालिकाको बैठक बसी निर्णय त गरियो पीडितलाई राहत दिन सकिएन् यो दुःखद कुरा हो । तथापी व्यक्तिगत रूपमा पीडितलाई खान र स्थायी रूपमा बस्ने वातावारणको व्यवस्था गरियो । प्रमुख प्रशासकीय अधिकृत आएको भन्ने सुनेको छु । अब तुरुन्तै पीडितहरूलाई क्षतिको १५ प्रतिशत रकम उपलब्ध गराउने छौँ ।

 

सजरुद्दिन मुसलमान

नगर प्रमुख, लुम्बिनी साँस्कृतिक नगरपालिका

लुम्बिनी साँस्कृतिक नगरपालिकामा आगलागीका कारण १३ घर पूर्ण रूपमा जलेर नष्ट भएका छन् । २ सय ५० विगाहा (कच्ची) को गहुँबाली जलेर नष्ट भएको छ भने पशु चौपाया, फलफूल बगैँचा, तरकारी खेती समेत जलेर नष्ट भएको छ । आगो निभाउनका लागि लुम्बिनी साँस्कृतिक नगरपालिका, तिलोत्तमा नगरपालिका, सिद्धार्थनगर नगरपालिका, सैनामैना नगरपालिकाको दमकल, सशस्त्र प्रहरी, नेपाल प्रहरी, स्थानीय लगायतको सहयोगमा आगो निभाइएको थियो । आगलागीबाट कुनै प्रकारको मानवीय क्षति नभए पनि भौतिक सम्पत्तिको धेरै क्षति भएको छ । आगलागीका कारण के कति क्षति भयो त्यसको पूर्ण विवरण आउन बाँकी रहेको छ । आगलागी पीडितका लागि जिल्ला प्रशासन कार्यालयमा राहतको लागि नाम सिफारिस गर्ने कार्य भइरहेको छ भने स्थानीय सरकारले आगलागी पीडितका लागि कार्यपालिकाको बैठक मार्फत निर्णय गरी एक कठ्ठाको १ हजार रूपियाँका दरले सहयोग गर्ने निर्णय गरेको छ । ‍तत्कालका लागि आवश्यक खाद्यान्न वितरण गरेको छ । आगलागी पीडितका लागि जिल्ला प्रशासन कार्यालयले बिपद राहत कोष मार्फत १५ हजारका दरले राहत दिनका लागि तथ्याङ्क लिएको छ । पीडित परिवारका लागि स्थानीय तहले पूर्ण क्षति भएका पीडितका लागि १५ हजार र आंशिक क्षति भएका परिवारका लागि ५ हजार रूपियाँका दरले राहत उपलब्ध गराएको छ । रेडक्रसले पनि खाद्यान्न, त्रिपाल लगायतका सामग्रीहरू वितरण गरेको छ । त्यस्तै सुजी फाउण्डेशन मार्फत पनि पूर्ण क्षति भएका पीडितका लागि लत्ता कपडा तथा खाद्यान्न दाल, चामल, तेल, नुन लगायतका सामग्रीहरू वितरण भइरहेको छ । स्थानीय सरकारले पीडितहरूको पीडामा स्थानीय सरकारसँगै छ भन्ने महसुस गराउन खोजेका छौँ । उहाँहरूको आँसु पुछ्ने कोसिसमा हामी जुटिरहेका छौँ । क्षतिको पूर्ण विवरण आइसकेपछि सोही अनुसार अगाडि बढ्न सकिन्छ ।

 

गयाप्रसाद बरई

अध्यक्ष, मर्चवारी गाउँपालिका

तराईमा अत्यधिक बढेको गर्मी र तातो हावाहुरी चलेसँगै आगलागीबाट मर्चवारी गाउँपालिकामा धेरै क्षति पुर्‍याएको छ । आगलागीबाट मर्चवारी गाउँपालिकाको वडा नं.१ मा २१ घर, वडा नं.२ मा दुई घर र वडा नं. मा एक घर परिवार विस्थापित भएका छन् । आगलागीका कारण पूर्ण रूपमा जलेर नष्ट भएका छन् । आगो निभाउनका लागि नेपाली सेना, सशस्त्र प्रहरी, नेपाल प्रहरी, स्थानीय सरकार लगाएत सबैले सहयोग गरेकाले थप क्षति हुनबाट बचेको छ । आगलागीबाट पीडित परिवारलाई 'क' श्रेणी र 'ख' श्रेणीमा विभाजन गरेर राहत वितरण गरिएको छ । जिल्ला प्रशासन कार्यालयले बिपद राहत कोष मार्फत 'क' श्रेणीको एक जनालाई २० हजार र 'ख' श्रेणीका घर परिवारलाई १५ हजार रूपियाँका दरले रकम उपलब्ध गराएको छ । आगलागी पीडितका लागि मर्चवारी गाउँपालिकाले 'क' श्रेणीका ६ जनालाई २५ हजारका दरले र 'ख' श्रेणीका पीडितहरूका लागि १५ हजार र 'ग' श्रेणीका पीडित परिवारलाई १० हजारका दरले राहत कार्यपालिकाको निर्णय गरी उपलब्ध गराइएको छ । त्यस बाहेक दाल, चामल, तेल, नुन लगायतका खाद्यान्नहरू र त्रिपाल समेत उपलब्ध गराइएको छ । आगलागीका कारण मानवीय क्षति नभएको तर पशुपंक्षी, चौपाया जलेकाले उपचार भइरहेको छ । आगलागीका कारण स्थानीय तहमा अनुमानित ५० लाख रूपियाँ भन्दा बढीको क्षति भएको र अन्य विवरण आउन बाँकी रहेको छ । आगलागीबाट अति गरिब र विपन्न परिवारहरू बढी प्रभावित भएको र उनीहरूको संरक्षणका विषयमा पालिका गम्भीर रहेको छ ।

 

सुरेन्द्र  पौडेल

अध्यक्ष, गैडहवा गाउँपालिका

आगलागीका कारण गैडहवा गाउँपालिकामा अनुमानित ३२ लाख ५१ हजार ६ सय रूपियाँ बराबरको क्षति भएको छ । आगलागीबाट गैडहवा गाउँपालिकाको वडा नं १, २ र ७ का किसान तथा घरपरिवार प्रभावित भएका छन् । वडा नं. २ मा पाकेर काट्न तयार भएको गहुँमा आगो लाग्दा १० जना किसानहरू पीडित भएका छन् । वर्षभरी दुःख गरेर भित्र्याउने तयारी रहेको गहुँमा आगलागी हुँदा १० जना किसानको गहुँबली पूर्णतया नष्ट भएको छ । आगलगीबाट २८ लाख ४६ हजार रूपियाँ बराबरको क्षति भएको अनुमान गरिएको छ । त्यस्तै वडा नं २ मै आठ घर पूर्ण रूपमा जलेर नष्ट भएका छन् । आगो निभाउनका लागि गैडहवा गाउँपालिका र लुम्बिनी साँस्कृतिक नगरपालिकाको दमकलले आगो निभाएको छ । पीडितहरूका लागि गाउँपालिकाले खाद्यान्नहरू चामल, दाल, तेल, नुन लगायत वितरण गरेको छ । प्रमुख प्रशासकीय अधिकृत विदामा रहेकाले आर्थिक सहयोग गर्न नसकिएको तथापी गर्ने योजना रहेको छ । जिल्ला प्रशासन कार्यालयले बिपद राहत कोष मार्फत दिने राहतका लागि विवरण सङ्कलन गरेर पठाइएकाले अब केही दिनमै राहत उपलब्ध गराउने छौँ ।