इन्सेक गतिविधिहरू

इन्सेक पूर्वाञ्चल क्षेत्रीय कार्यालय विराटनगरको आयोजनामा ०७३ चैत १ गते जिल्ला परियोजना सल्लाहकार समितिको बैठक तथा अनुभव आदानप्रदान कार्यक्रम सुनसरी सदरमुकाम इनरुवामा सम्पन्न भएको छ ।

इन्सेकद्वारा सुनसरीको इनरुवा नपा-७ र गढी गाउँपालिका-२ साविक चाँदवेला र औरावनी गाविसमा सञ्चालित स्थानीय समुदायलाई सचेत पार्दै जिम्मेवार निकायलाई जवाफदेही बनाउने (इएलपी) कार्यक्रम र दुहवी नगरपालिका-१० साविक सिमरिया गाविसमा सञ्चालित कियोस परियोजनाको बारेमा जानकारी दिन र सुझाव सङ्कलनका लागि कार्यक्रम आयोजना गरिएको हो ।

बैठकको अध्यक्षता गर्दै जिल्ला परियोजना सल्लाहकार समितिका संयोजक तथा स्थानीय विकास अधिकारी तुलसीबहादुर श्रेष्ठले इन्सेकका कार्यक्रम राजनीतिक र नागरिक अधिकारमा मात्र सीमित नराखेर आर्थिक, सामाजिक र सांस्कृतिक अधिकारमासमेत केन्द्रित गर्नुपर्ने बताए ।

कार्यक्रममा जिल्ला कृषि विकास कार्यालयका प्रमुख राजकान्त झाले इन्सेकले गर्ने कार्यक्रमले सेवा प्रदायक निकायलाई घच्घच्याउने भएकाले सेवाग्राहीहरूलाई सहयोग पुग्ने बताए । उनले समस्याहरू जिल्लासम्म ल्याइपुर्‍याउन यस्ता कार्याक्रम उपयोगी हुने बताए ।

इन्सेकले सञ्चालन गरेका परियोजनाका बारेमा इन्सेक पूर्वाञ्चल क्षेत्रीय कार्यालयकी कार्यक्रम अधिकृत बाग्मती कट्टेलले जानकारी गराएकी थिइन् । कार्यक्रममा सहायक प्रमुख जिल्ला अधिकारी राजेश गिरी, जिल्ला पशु कार्यालयका प्रमुख शिवनाथ महतो, इन्सेक पूर्वाञ्चल क्षेत्रीय कार्यालयका संयोजक सोमराज थापालगायतले बोलेका थिए ।

शेखर ढकाल