इन्सेक गतिविधिहरू

११३ औँ अन्तराष्ट्रिय महिला दिवसको अवसरमा ०७९ फागुन २४ गते हेटौँडामा मानव अधिकार तथा महिला अधिकारका क्षेत्रमा क्रियाशिल संस्थाहरूले संयुक्त रूपमा र्‍याली सहित कोण सभा सम्पन्न भएको छ ।

यसैगरी अन्तराष्ट्रिय महिला अधिकार दिवसको अवसरमा हेटौँडामा दिप प्रज्वलन कार्यक्रम सम्पन्न भएको छ । हेटौँडामा सबैले संयुक्त रुपमा द्धिप प्रज्वलन गरी सामुहिक रुपमा उद्धघाटन गर्दै संविधानमा महिला, पुरूष र यौनिक तथा लैङ्गिक अल्पसंख्यक समुदायको समान अधिकार भएकोले व्यवहारमा कार्यान्वयनमा ल्याउन सन्देश दिइएको थियो ।

‘लैङ्गिक समानताको बलियो आधार सिर्जनात्मक प्रविधिमा महिला पहुँचमा विस्तार’ भन्ने मुल नाराका साथ अनौपचारिक क्षेत्र सेवा केन्द्र (इन्सेक) लगाएतका सङ्घसंस्थाहरूले संयुक्त रूपमा र्‍यालीको आयोजना गरेका हुन् । हेटौँडा उपमहानगरपालिकाबाट सुरु भएको र्‍याली बजार परिक्रमासँगै बुद्धचोकमा पुगेर कोण सभा गरी सम्पन्न भएको थियो ।

कार्यक्रममा इन्सेक बागमती प्रदेश संयोजक गणेश भण्डारीले अझै पनि नेपालमा महिलामाथि हुने हिंसाहरूमा कमी नआएको बताउनुभयो ।

महिलाहरूलाई हिंसाबाट जोगिने र हिंसा पीडितलाई स्वास्थ्य सेवाबाट वन्चित नगर्ने अवस्थाका लागि अभियान सञ्चालन गर्नुपर्ने अवस्था रहेको भण्डारीले बताउनु भयो ।

लैङ्गिक हिंसाले महिलाको साथै पुरुषहरूको पूर्णक्षमताको प्रयोगमा नकारात्मक असर पर्नुको साथै आर्थिक विकास र महिला सशक्तीकरणको बाटोमा अवरोध सिर्जना भएको भन्दै हिंसा न्युनिकरणका लागि सबैले साझा एजेण्डाको रूपमा अघि बढाउनुपर्ने हेटौँडा उपमहानगरका प्रमुख मीनाकुमारी लामाले बताउनुभयो ।

महिलामाथि हुने हिंसा न्यूनिकरण अभियानमा पुरुषलाई पनि सँगसँगै अघि बढाउनुपर्ने मेन ईगेज एलायन्स मकवानपुर जिल्ला अध्यक्ष प्रकाश खतिवडाले बताउनुभयो ।

महिला र पुरुष दुवैले समान अपनत्व गर्‍यो भने समाजमा लैङ्गिक हिंसा न्यूनिकरणमा उल्लेख्य सुधार हुने विश्वास अध्यक्ष खतिवडाले व्यक्त गर्नुभयो ।

कार्यक्रममा इन्सेक, हेटौँडा उपमहानगरपालिका, मेन ईगेज एलायन्सका मकवानपुर, बाल कल्याण समाज मकवानपुर, माइती नेपाल मकवानपुर, हिमराइट्स मकवानपुर, सामाजिक विकास मन्त्रालय बागमती प्रदेश, महिला प्रहरी लगाएत अन्य विभिन्न सङ्घसंस्थाका प्रतिनिधिहरूको सहभागीता रहेको थियो ।

इन्सेक बागमती प्रदेश कार्यलय, हेटौँडा