इन्सेक गतिविधिहरू

इन्सेक कञ्चनपुर र मानव अधिकार निगरानी समूह, कञ्चनपुरको आयोजनामा महाकाली अञ्चल अस्पतालमा अस्पतालको सेवा प्रवाहका बारेमा चैत २७ गते छलफल सम्वाद सम्पन्न भएको छ ।

सो कार्यक्रममा महाकाली अञ्चल अस्पतालका निर्देशक डक्टर श्रीकृष्ण भट्टले अञ्चल अस्पतालले प्रदान गरिरहेको सेवा प्रवाह र पाउने सेवा सुविधाका बारेमा जानकारी गराएका थिए । महाकाली अञ्चल अस्पतालमा २१ जना चिकित्सकको दरबन्दी भएपनि तीन जना चिकत्सक मात्र रहेकाले सेवा प्रवाह गर्न समस्या रहेको निर्देशक भट्टले बताए ।

अस्पतालकी नर्सिङ शाखा प्रमुख जानकी जोशीले बिरामीका आफन्तजनहरूको भिडले गर्दा सेवा सम्पादन गर्न गाह्रो भएको बताइन् ।

अञ्चल अस्पतालमा चिकित्सक अभावका कारण सामान्य सेवाहरू पनि नपाइने गरेका कारण बिरामीहरू अस्पताल नआउने गरेको मानव अधिकार निगरानी समूहकी सदस्य भगवती थापाले बताइन् ।

निगरानी समूहकी सदस्य भुवन कुवरले अस्पतालमा भएको न्यून मानवीय श्रोतले पनि बढीभन्दा बढी सेवा दिएर अस्पतालप्रति नागरिकहरूको विश्वास बढाउनु पर्ने बताइन् ।

अञ्चल अस्पतालले प्रदान गर्ने सेवा सुधार गर्ने र दरबन्दी अनुसारको चिकित्सक परिपूर्तिका लागि पहल भइरहेका अञ्चल अस्पताल विकास समितिका अध्यक्ष अशोक पाण्डेयले बताए ।

कोमलनिरन्जन भाट