इन्सेक गतिविधिहरू

अनौपचारिक क्षेत्र सेवा केन्द्र (इन्सेक) नवलपुरको आयोजनामा विनयी त्रिवेणी गाउँपालिकामा स्वास्थ्यको अधिकारसम्बन्धी अन्तरक्रिया कार्यक्रम चैत १५ गते सम्पन्न गरिएको छ ।

स्थानीय समुदायलाई सचेत पार्दै जिम्मेवार निकायलाई जवाफदेही बनाउन पहल कार्यक्रम (इएलपी) अन्तर्गत आयोजना भएको कार्यक्रममा सहभागीहरुले स्थानीय स्वास्थ्य चौकीहरुमा नेपाल सरकारले उपलब्ध गराउने निःशुल्क औषधिको नियमित उपलब्धता नभएको बताउनुभएको थियो ।

गाउँपालिकाले सबै वडामा स्वास्थ्य सेवाको पहुँच स्थापित गरेको भएपनि निःशुल्क उपलब्ध हुनुपर्ने औषधिको उपलब्धता, स्वास्थ्यकर्मीले प्रदान गर्ने सेवाको बारेमा जिज्ञासा राख्नु भएको थियो ।

कार्यक्रममा प्रमुख अतिथि विनयी त्रिवेणी गाउँपालिकाका उपाध्यक्ष मिनाकुमारी रानाले गाउँपालिकाले सबै क्षेत्रका नागरिकलाई स्वास्थ्य सेवा प्रवाह गर्ने सदैव पालिका प्रतिबद्ध रहेको बताउनुभयो ।

विगतको स्वास्थ्य संस्था र हाल प्रत्येक वडा तथा पायक पर्ने स्थानमा स्थापना भएका स्वास्थ्य इकाई मार्फत सेवा सञ्चालनले स्थानीयलाई सहजता ल्याएको बताउनुभयो ।

विनयी त्रिवेणी गाउँपालिका–७ का वडाध्यक्ष गोपालबहादुर क्षेत्रीले आवश्यकता अनुसार औषधिको व्यवस्थापनमा स्वास्थ्य चौकी लागि परेको बताउनुभयो ।

स्वास्थ्य चौकीबाट प्रवाह हुने सेवामा बिस्वस्त हुन उहाँले स्थानीय सेवाग्राहीलाई अनुरोध गर्नुभयो ।

कार्यक्रममा स्थानीयले निःशुल्क रुपमा प्राप्त हुने औषधिको बारेमा आम उपभोक्ताहरुलाई आवश्यक जानकारी समेत नरहेको बताउनुभएको थियो ।

कार्यक्रममा इन्सेक नवलपुरका सहजकर्ता गङ्गा विश्वकर्माले यहाँ पहिचान भएका सवालहरु पलिका र सम्बन्धित निकायमा ध्यानाकर्षण गराउने बताउनुभयो ।

तिर्थराज डुम्रे