स्वरोजगार मूलक कार्यक्रम बनाउन आग्रह

जिल्ला समन्वय समितिका कार्यवाहक प्रमुख बालकृष्ण केसीले सशस्त्र द्वन्द्वको क्रममा घाइते तथा अपाङ्गता भएकाहरूका लागि आयमूलक तथा स्वरोजगारमूलक कार्यक्रमहरू बनाउन आग्रह गरेका छन् ।

Photo20180326Dailekh (1)

अनौपचारिक क्षेत्र सेवा केन्द्र (इन्सेक)को समन्वयमा न्याय, लोकतन्त्र र शान्तिको पहलमा नागरिक आवाज ललितपुरद्वारा दैलेख सदरमुकाममा चैत १२ गते आयोजित द्वन्द्वका घाइते र स्थानीय सरकारको जिम्मेवारी विषयक अन्तरक्रिया कार्यक्रममा उनले यस्तो आग्रह गरेका हुन् ।

कार्यवाहक प्रमुख केसीले स्थानीय तहमा बजेट र अधिकार समेत गएकोले सरकारी र गैरसरकारी क्षेत्रबाट सेवा सुविधा पाउन नसकेका वास्तविक द्वन्द्व पीडितका लागि कार्यक्रम बनाउन स्थानीय तहलाई सुझाव दिए । उनले द्वन्द्व पीडितले पाएको सुविधाहरूलाई व्यवसायिक क्षमता विकासमा प्रयोग गर्न आग्रह गरे ।

Photo20180326Dailekh (2)

कार्यक्रममा नेपाल रेडक्रस सोसाइटीका जिल्ला सभापति खेमराज केसीले सूचना तथा पहुँचको अभावमा केही छिटपुट बेपत्ता, घाइते र अपाङ्गता भएका व्यक्तिले अझै राज्यबाट पाउनुपर्ने सुविधा दिलाउन सत्य निरूपण तथा मेलमिलाप आयोग र बेपत्ता पारिएका व्यक्तिको छानविन आयोगले पहल गर्नुपर्ने सुझाव दिए ।

जिविसका पूर्व उपसभापति सूर्यबहादुर शाहीले गरिब, विपन्न र पिछडिएको जाति, वर्ग तथा क्षेत्रको पहुँच पर्‍याउन स्थानीय तहको सरकारको व्यवस्था भएको उल्लेख गर्दै छुटेका द्वन्द्व पीडितहरूको राहत तथा पुनर्स्थापनामा समेत कार्यक्रम बनाउन प्राथमिकता दिनुपर्ने बताए ।

अन्तरक्रियाका सहभागी सरोकारवाला निकायहरूले द्वन्द्वका क्रममा घाइते भएकाहरू, अन्य पीडितहरूको राहत तथा पुनर्स्थापनाका कार्यक्रम ल्याउन दैलेखका चार वटा नगरपालिका र सात वटा गाउँपालिकालाई जिल्ला समन्वय समिति दैलेखले परिपत्र गर्ने र अन्य सरोकारवाला निकायहरूले समन्वय गर्ने प्रतिबद्धता जनाएका छन् ।

अमर सुनार