इन्सेक गतिविधिहरू

पञ्चपुरी नगरपालिकाको बाबियाचौरमा स्थानीय तहमा समस्या पहिचान तथा कार्ययोजना बैठक सम्पन्न गरिएको छ । अनौपचारिक क्षेत्र सेवा केन्द्र (इन्सेक) को आयोजनामा गठित पञ्चपुरी नगरपालिका स्तरीय मानव अधिकार समूहको समन्वयमा ०८१ भदौ २६ गते स्थानीय तहमा रहेका शिक्षा, स्वास्थ्य, वातावरण संरक्षण र विभेदसम्बन्धी समस्या पहिचान गरिएको हो ।

बैठकबाट शिक्षामा मुख्य समस्या अन्तर्गत दरबन्दी अनुसार शिक्षकको समस्या, अपाङ्गमैत्री शौचालयको अभाव, विद्यालय स्तरमा खानेपानीको कमी, विषयगत शिक्षकको अभाव, किशोरीहरूलाई मनोपरामर्शको कमी, प्रत्येक स्कुलमा प्राथामिक उपचारको व्यवस्थापन र स्कुलहरूमा स्टेचरको अभाव जस्ता समस्याहरू पहिचान गरिएको छ ।

त्यस्तै स्वास्थ्य संस्थामा प्रेसर, सुगर,दम र छालासम्बन्धी रोग, स्वास्थ्य केन्द्रहरूमा समयभित्र औषधि उपलब्ध नहुनु, स्वास्थ्य केन्द्रमा अपाङ्गमैत्री शौचालय नहुनु र खानेपानीको समस्या, समुदायस्तरमा स्वास्थ्यसम्बन्धी जनचेतनामूलक कार्यक्रमहरू नहुनु र बोतलमा भएको पानीको असर, स्वास्थ्यमा अनुगमनको कमी, स्वास्थ्य बिमा बारे अझै पनि नागरिकमा जानकारी नहुनु, बजेटको अभाव र खरिद प्रक्रियामा समस्या जस्ता विषयहरू बैठकबाट पहिचान भएको इन्सेकका फोकल पर्सन ललिता विकले जानकारी दिनुभयो ।

बैठकको सहजीकरण गर्दै फोकल पर्सन विकले वातावरण संरक्षणमा प्लास्टिकजन्य वस्तुहरूको व्यवस्थापनमा कमी, डम्पिङ साइडको व्यवस्थापन नहुनु, बजार परिसरभित्र डस्टबिनको व्यवस्थापन नहुनु, वृक्षारोपण गरिसकेपछि अनुगमन र संरक्षणको कमी, अनावश्यक डोजरको प्रयोगबाट पानीको मुहान सुक्दै जानु, भुक्षय हुनु र डढेलो नियन्त्रणका लागि अग्नी रेखाको व्यवस्थापन नहुनु र सिचाइँ कुलोको पानीमा जथाभावी फोहोर फाल्दा खेतमा परेको प्रभाव जस्ता समस्याको पहिचान भएको उल्लेख गर्नुभयो ।

त्यसैगरी विभेदका सवालमा मुख्य समस्याको रुपमा छाउपडी प्रथाका कारण बालबालिका माथि नै हिंसा हुने, अझै पनि विवाह ब्रतबन्ध जस्ता सामाजिक कार्यमा विभेद हुने गरेको, महिला हिंसा, घरेलु हिंसा र बालविवाह जस्ता स्थानीय तह स्तरमा रहेका विभिन्न शीर्षकमा समस्या पहिचान गरिएको छ ।

बैठकबाट पहिचान भएका समस्याहरूलाई मानव अधिकार समूहले सम्बन्धित निकायसँग सम्बन्धित समस्याको विषयमा जवाफदेही बनाउन ध्यानाकर्षण गरिने जनाइएको छ । बैठकमा मानव अधिकार समूहका पदाधिकारी, सम्बन्धित निकायका शाखा प्रतिनिधित्वहरू, बाल अधिकार समूहका अध्यक्षको सहभागिताबाट समस्या पहिचान गरिएको थियो ।

जगतदल जनाला विक