इन्सेक गतिविधिहरू

अनौपचारिक क्षेत्र सेवा केन्द्र (इन्सेक) को आयोजानामा सेवा प्रदायक र सेवाग्राहीबीच जिल्लास्तरीय अन्तर्क्रिया कार्यक्रम असार ३१ गते जनकपुरमा सम्पन्न गरिएको छ ।

स्थानीय समुदायले सचेत पार्दै जिम्मेवार निकायलाई जबाफदेही बनाउने कार्यक्रम अन्तर्गत शिक्षा, स्वास्थ्य र खाद्य अधिकारको अवस्थाबारे अन्तर्क्रिया गरिएको हो ।

हालको अवस्थामा शिक्षा, स्वास्थ्य र खाद्यान्नसँग सम्बन्धित अधिकारहरू स्थानीय तहमा गएकाले नियमन सञ्चालनमा समस्या भएको कार्यक्रमका सहभागीहरूको भनाइ छ । स्थानीय तहहरू पूर्णरूपले व्यवस्थित हुन नसकेकोले कार्य सम्पादनमा समेत कठिनाइ उत्पन्न भइरहेको र जनताले पाउनु पर्ने अति आवश्यक अधिकारहरू उपभोग गर्न नपाएको सहभागीले गुनासो गरे ।

शिक्षा विकास समन्वय समितिका अधिकृत राजदेव यादवले शिक्षामा रहेका समस्याहरूलाई समन्वय गरी सामाधान गरिने बताए ।

शिक्षक गणेश महतोले समयमा तलब नखुवाएका कारण शिक्षकहरूलाई समस्या भएको बताए । उनले विद्यार्थी भर्ना अभियान जोडतोडले चलेपनि विद्यालयमा विद्यार्थी सङ्ख्या न्यून रहेको बताए ।

कार्यक्रममा मानव अधिकार निगरानी समूहकी सचिव उर्मिला यादवले स्वास्थ्य चौकीहरूमा जनतालाई निःशुल्क औषधिमा सहज पहुँच नभएकोले जनसङ्ख्याको आधारमा औषधि वितरण हुनु पर्नेमा जोड दिइन् । उनले शिक्षामा समान व्यवहार लागु भइरहेको उल्लेख गर्दै दलित बालबालिकालाई शिक्षाको पहुँचमा विशेष ध्यान दिनु पर्ने बताइन् ।

मानव अधिकार निगरानी समूह बटेश्वरका सचिव दिलिप लामाले तरकारी बालीमा विषादीहरू छर्कने गरेकाले मानिसहरूमा विभिन्न रोगहरू देखा परेको कारण विषादी नियन्त्रण गर्नु पर्ने बताए ।

स्थानीय तहसँग समन्वय गरी शिक्षा, स्वास्थ र खाद्यान्नमा रहेका समस्याहरू समाधान गरिने जिल्ला जनस्वास्थका प्रमुख हरिशचन्द्र साहले बताए । उनले भने-"सबै अधिकार र वजेट स्थानीय निकायमा गएकोले अब हामी समन्वय गर्ने काम मात्र गर्नेछौँ ।"

विनोदकुमार रविदास