इन्सेक गतिविधिहरू

इन्सेक क्षेत्रीय कार्यालय विराटनगरको आयोजनामा शिक्षा, स्वास्थ्य र खाद्य अधिकारका विषयमा सुनसरी जिल्लाका सेवा प्रदाय निकायका प्रमुख तथा प्रतिनिधि र सेवाग्राहीबिच चैत २९ गते इनरुवामा अन्तरक्रिया कार्यक्रम सम्पन्न गरिएको छ ।

स्थानीय समुदायलाई सचेत पार्दै जिम्मेवार निकायलाई जवाफदेही बनाउने कार्यक्रम अन्तर्गत जिल्लाका सरोकारवालासँग अन्तरक्रिया गरिएको हो । कार्यक्रममा इन्सेकका पूर्वाञ्चल क्षेत्रीय संयोजक सोमराज थापाले राज्यको पुनःसंरचनासँगै नागरिक पनि रूपान्तरित हुनु पर्ने बताए ।

उनले राजनीतिक परिस्थिति अनुसार नागरिकले पनि आफ्ना अधिकारसँगै कर्तव्यलाई पनि विर्सन नहुने बताए । नागरिकका अधिकार स्थापित गर्नका लागि नागरिक आफैँ सचेत हुनुपर्ने उनको भनाइ थियो । जिम्मेवार निकायलाई बदलिँदो परिस्थिति अनुसार अझ जिम्मेवार बनाउन कार्यक्रम उपयोगी भएको संयोजक थापाको भनाइ छ ।

कार्यक्रमा सुनसरीको एउटा गाउँपालिका र अर्को नगरपालिकाको दुई वटा वडाका मानव अधिकार निगरानी समूहका पदाधिकारीले गाउँमा भोगिरहेका शिक्षा, स्वास्थ्य र खाद्यका समस्याहरू जिल्लास्थित सेवा प्रदायक निकायका प्रमुख तथा प्रतिनिधि समक्ष राखेका थिए ।

कार्यक्रममा जिल्ला पशु सेवा कार्यालयका प्रमुख शिवनाथ महतो, जिल्ला कृषि विकास कार्यालयका हेमराज कोइराला, जिल्ला स्वास्थ्य कार्यालयका उमेश गौतम लगायतले नागरिकका सवालको जबाफ दिएका थिए । उनीहरूले स्रोत साधनको अभावमा नागरिकले चाहेजस्तो सेवा दिन नसकिएको बताए । सिमित स्रोत र साधन अनुसार आफू र आफू मातहतका कार्यालयले सेवा दिइरहेको उनीहरूको भनाइ थियो ।

शेखर ढकाल