इन्सेक गतिविधिहरू

देशमा सुशासन कायम गराउन नागरिक समाजको भूमिका बलियो हुनुपर्नेमा एक कार्यक्रमका सहभागीले जोड दिएका छन् ।

अनौपचारिक क्षेत्र सेवा केन्द्र (इन्सेक) र मानव अधिकार सञ्जाल, गोरखाको संयुक्त आयोजनामा साउन २९ गते गोरखाको सदरमुकाममा आयोजना भएको 'नागरिक समाज र स्थानीय सरकारबीचको सहकार्यका अवसर र चुनौती' विषयक छलफल कार्यक्रमका सहभागीहरूले जिल्लाका ११ ओटै स्थानीय तहले गरेका गतिविधिमा नागरिक समाज चनाखो हुनुपर्नेमा जोड दिए ।

'सदरमुकाम केन्द्रीत भएर भन्दा पनि ११ ओटै स्थानीय तहका विकासका गतिविधिमा नागरिक चनाखो बन्नुपर्छ ।'-नेपाल पत्रकार महासङ्घ, गोरखा शाखाका अध्यक्ष किशोरजङ्ग थापाले भने-'नागरिकमैत्री काम भए भएनन् । आवश्यकता अनुसार काम भए नभएको, बजेट कसरी परिचालन भएका छन् । सोतर्फनागरिकको खबरदारी जरूरी छ ।'

स्थानीय तह आफैँले पनि नागरिक समाजलाई जागरूक बनाउनुपर्ने उनको भनाइ थियो । नागरिक समाजले नकरात्मक विषय मात्र उठान गर्छन् भन्ने भावनाबाट स्थानीय तहका प्रमुख तथा कर्मचारी माथि उठ्नुपर्ने कार्यक्रमका सहभागीले जोड दिएका थिए ।

नागरिक समाजलाई सहयोगीका रूपमा बुझ्नुपर्ने गैरसरकारी संस्था महासङ्घका सचिव हरि देवकोटाले बताए ।

जनप्रतिनिधिले नागरिक समाजसँग सहकार्य गरेर अघि बढ्दा पारदर्शीतामा प्रश्न नउठ्ने गोरखा नपा-६ का वडा अध्यक्ष नारायाण अर्यालले बताए ।

नागरिक समाजलाई नकरात्मक कुरा मात्र उठाउनुपर्छ भन्ने भावना नराख्न गोरखा नगरपालिकाका मेयर राजनराज पन्तले आग्रह गरे ।

'तीन तहको सरकारमा सबैभन्दा बढी प्रेसर नगर र गाउँपालिकालाई छ ।'-उनले भने-'जनताको अपेक्षा पनि हामीसँग नै छ । प्रदेश र सङ्घीय सरकारले स्थानीय तहसँग समन्वय गरेका छन् कि छैनन् ? त्यसतर्फपनि नागरिक समाजले ध्यान पुर्‍याउनुपर्‍यो । स्थानीय तहले आफ्नो अधिकार नाघ्यो भने पनि नागरिक समाज बोलिदिनुपर्‍यो । स्थानीय तहलाई हस्तक्षेप गरेर भएपनि आवाज उठाइदिनुपर्‍यो ।'

गोरखा नगरपालिका नागरिक समाजसँग सहकार्य गरेर अघि बढ्ने मेयर पन्तले प्रतिबद्घता जनाए । विकासात्मक गतिविधि भएका ठाउँमा होर्डिङ बोर्ड राख्न नागरिक स्तरबाटै माग भएको उनले बताए ।

'बजेट, योजनाको नाम, सम्झौता मिति सहितको होर्डिङ बोर्ड राख्न भनिसकेका छौँ ।'-उनले भने । सामाजिक सुरक्षा वितरणमा सहज बनाउने पनि उनले बताए ।

नगरपालिकाले सुशासनको नीति निर्माण गरिसकेको र राजपत्रमा प्रकाशन गर्ने चरणमा रहेको उनले जानकारी दिए ।

स्थानीय तहले विकासका काम गर्दा नागरिक समाजलाई सहभागी गराए गुणस्तरीय हुने शान्ति समाज, गोरखाका सिताराम तिवारीले बताए ।

नागरिक समाजसँग सहकार्य नभई गरिएका गतिविधि पारदर्शिता र जबाफदेहिता हुन नसक्ने सरोकारवाला पक्षको दावी थियो ।

साझा समूह बनाएर सङ्गठित हुन सके खबरदारी गर्न सहयोग पुग्ने एमनेष्टी इन्टरनेशनल समूह ७६ का अध्यक्ष रमेश अधिकारीले बताए ।

'नागरिक समाजले चेक एण्ड ब्यालेन्सको काम गर्ने गरी भूमिका अझै प्रभावकारी बनाउनुपर्छ ।'-एमनेष्टी इन्टरनेशनल महिला समूह ४२ की अध्यक्ष विमला वाग्लेले भनिन्-'विरोध मात्रै नभई स्थानीय सरकारसँग र समन्वय र सहकार्यको आधारमा सघाउन पनि सकिन्छ ।'

कार्यक्रममा जिल्लास्थित सरकारी निकायका प्रमुख तथा प्रतिनिधि, नागरिक सङ्गठनका प्रतिनिधि तथा सञ्चारकर्मीहरूको उपस्थिति रहेको थियो ।

हरिराम उप्रेती