इन्सेक गतिविधिहरू

अनौपचारिक क्षेत्र सेवा केन्द्र (इन्सेक) को आयोजनामा मकवानपुर जिल्लाको मनहरी गाउँपालिका वडा नम्बर ३ मा रिन्यु परियोजना अन्तर्गत सिफारिस संयन्त्रसम्बन्धी अन्तर्क्रिया कार्यक्रम ०८० असोज १० गते सम्पन्न भएको छ ।

मनहरी गाउँपालिका वडा नम्बर ३ मा डब्लुपीडी नेपालको सहकार्यमा इन्सेकले सञ्चालन गरिरहेको अधिकार तथा आर्थिक विकासमार्फत महिला सशक्तिकरण कार्यक्रम (रिन्यु परियोजना) अन्तर्गत गाउँपालिकामा भएको सिफारिस संयन्त्रसम्बन्धी कार्यक्रममा सयन्त्र गठन गरिएको हो ।

मनहरी गाउँपालिका वडा नम्बर १, ३ र ४ मा महिला हिंसा न्यूनीकरण र महिला तथा बालबालिकामाथि हुने हिंसाका घटना न्यूनीकरण गर्न र सामाजिक सशक्तिकरण गर्नका लागि सम्बन्धित वडाका वडा अध्यक्षको संयोजकत्वमा सिफारिस संयन्त्र गठन गरियो । उक्त संयन्त्रमा वडा नं १, ३, ४ र हेटौँडा उपमहानगरपालिका-१९ का विभिन्न १५ महिला समूहका मोटिभेटर, अध्यक्ष र स्थानीय निर्वाचित महिला वडा सदस्यको सहभागिता रहेको थियो ।

उक्त कार्यक्रममा आगामी दिनमा यस संयन्त्रले महिला, बालबालिका तथा अति विपन्न वर्गका समूदायको सहभागिताका लागि थप सशक्तिकरणमा मदत गर्ने जस्ता विषयमा छलफल भएको थियो ।

कार्यक्रममा बोल्दै मनहरी गाउँपालिका वडा नं ४ का वडा अध्यक्ष प्रकाश थापाले वडामा महिला हिंसा न्यूनीकरण र महिला बालबालिकाहरूको सामाजिक-आर्थिक सशक्तिकरण कार्यमा इन्सेक र डब्लुपीडी नेपाल विगत तीन वर्षदेखि भएका कार्यहरू उपलब्ध र उल्लेखनीय रहेको बताउनु भयो । उहाँले उक्त कार्यक्रममा आगामी दिनमा यस नेटवर्कले सहजीकरण वा सहभागिताका साथै स्थानीय बालबालिकाको नीति कार्यक्रममा जोडेर थप महिला सशक्तीकरणमा समेत मदत गर्ने बताउनुभएको थियो ।

उहाँले स्थानीय सरकारबाट महिलाको सामाजिक सशक्तिकरणसँगै आर्थिक उन्नतिबाट थप आयआर्जनमा समेत मद्दत गर्ने उल्लेख गर्नुभयो ।

कार्यक्रमको उद्देश्य र सहजीकरण गर्दै इन्सेकका कार्यक्रम संयोजक कृष्णप्रसाद नेपालले परियोजना लक्षित कार्यक्रमबाट महिला शसक्तिकरण र स्थानीय सरकारलाई जिम्मेवार बनाउन र मानव अधिकार मैत्री शासन व्यवस्था प्रणालीलाई अवलम्बन गर्नको लागि यो परियोजना केन्द्रित रहेको बताउनु भयो ।

कार्यपालिका सदस्य सेतीमाया तामाङले सिफारिस संयन्त्र र कानुनी प्रणाली तथा महिला हिंसा न्यूनीकरण गर्नका लागि महिला तथा बालबालिकाहरूको सहभागिताको विकास भएमा आगामी दिनमा स्थानीय सरकारबाट मानव अधिकार र महिला अधिकार प्रवर्द्धनमा थप काम गर्नु पर्ने बताउनु भयो ।

पुष्पराज अधिकारी