इन्सेक गतिविधिहरू

अनौपचारिक क्षेत्र सेवा केन्द्र (इन्सेक) ले फागुन ६ गते दोलखाको सुस्पाक्षमावती गाविस-१ पानीपोखरीमा आयोजना गरेको सार्वजनिक सुनुवाइमा सहभागी भूकम्पपीडित महिलाहरूले सुरक्षाको सवाललाई जोडतोडका साथ उठाएका छन् ।

टहरामा सिङ्गो परिवार बस्नु परेकाले कपडा फेर्नसमेत असहज हुने गरेको सहभागी महिलाहरूले गुनासो गरे । 'बिहान बेलुकी कपडा बदल्न नजिकैको जङ्गल जाने गरेका छौँ ।'-पशुपती थामीले भनिन् ।

भूकम्पका कारण विस्थापित भई सोही वडाको बोसिम्पा र बुमाटोलका ८४ घरधुरी अहिले पानीपोखरीको सार्वजनिक जग्गामा अस्थायी टहरोमा बस्दै आएका छन् । सामूहिक रूपमा टहरामा बस्दा महिलाहरूले बढी सास्ती खेप्नु परेको सहभागीहरुले गुनासो गरे ।

उनीहरू बस्दै आएको जमीनमा धाँजा फाटेर बस्न नमिल्ने भएपछि विस्थापित भई पानीपोखरीमा बस्दै आएका हुन् । अधिकाँश थामी समुदायको बसोबास रहेको बोसिम्पा र बुमाटोलका विस्थापितले आफ्नो सुरक्षित जग्गा जमीन नभएकोले सुरक्षित आवास निर्माण गर्न सकेका छैनन् । जग्गा नहुँदा सरकारले सुरक्षित निजी आवास निर्माणका लागि दिएको ५० हजार रुपियाँसमेत पाल किन्दै सकिन लागेको स्थानीय भीम थामीले गुनासो गरे ।

विस्थापितहरूले निजी आवास निर्माणका लागि सुरक्षित जग्गा उपलब्ध गराइदिन माग गर्दै आफूहरु भएको जग्गाधनी पुर्जा र निवेदन समेत जिल्ला प्रशासन कार्यालयमा बुझाएको बताएका छन् ।

कार्यक्रममा स्थानीय समुदायको गुनासो सम्बोधन गर्दै जिल्ला प्रशासन कार्यालय दोलखाका सहायक प्रमुख जिल्ला अधिकारी बालकृष्ण कटुवालले सरकारी नियम अनुसार निजी आवास निर्माणका लागि ५० हजार रुपियाँ उपलब्ध गराएको हुँदा नियम विपरित थप सहयोग गर्न नमिल्ने बताए । छोटो प्रक्रियाबाट जग्गा उपलब्ध गराउने कार्य सुरु भएको उनले जानकारी दिए ।

उद्धव पोखरेल