इन्सेक गतिविधिहरू

स्थानीय सरकारसँग जोडिएका सार्वजनिक सरोकारको विषयमा शिवपुरी गाउँपालिकामा सार्वजनिक सुनुवाई कार्यक्रम सञ्चालन भएको छ । अनौपचारिक क्षेत्र सेवा केन्द्र (इन्सेक) को आयोजनामा शिवपुरी गाउँपालिकाको वडा नं. ८ को सार्वजनिक सुनुवाई कार्यक्रम थानापतिमा ०८० भदौ १७ गते सम्पन्न भएको हो ।

डब्लुपिडि नेपाल र इन्सेकको सहकार्यमा शिवपुरी गाउँपालिका वडा नं. ८ मा 'अधिकार तथा आर्थिक विकासमार्फत महिला सशक्तिकरण' रिन्यु परियोजना अन्तर्गत अन्तर्क्रिया कार्यक्रम सम्पन्न भएको हो ।

कार्यक्रममा गाउँपालिकाका अध्यक्ष गोविन्दप्रसाद थपलियाले गाउँपालिकाले दिगो विकासका लक्ष्य, योजना र नीतिलाई अवलम्बन गरी महिलालाई आर्थिक तथा सामाजिक सशक्तिकरणसँग जोडेको बताउनु भयो । महिलाको सवालमा स्थानीय नागरिक समाज, राजनीतिक दलको उत्तिकै जिम्मेवारी रहेको उल्लेख गर्नुहुँदै अध्यक्ष थपलियाले महिलालाई आर्थिक तथा सामाजिक सशक्तिकरणको लागि वडा र स्थानीय तहबाट बनाइने नीति तथा योजनाको लागि इन्सेक जस्ता संस्थाहरूको भूमिका सह्रानीय रहेको समेत बताउनु भयो ।

कार्यक्रममा शिवपुरी गाउँपालिका वडा नं. ८ का वडा अध्यक्ष केशवप्रसाद रिजालले स्थानीय तहले महिलाको आयआर्जन र सशक्तिकरणको योजनालाई प्राथमिकतामा राखेको बताउनु भयो ।

कार्यक्रममा गाउँपालिकाका स्वास्थ्य शाखा प्रमुख नारायण श्रेष्ठले स्थानीय सरकारको स्रोत साधन परिचालन गरी सुत्केरी भत्ता, स्वास्थ्य परीक्षण, निशुल्क खोप तथा औषधी वितरणलाई प्रभावकारी बनाइएको बताउनु भयो ।

कार्यक्रममा महिला सञ्जालकी अध्यक्ष सीतादेवी पोखरेलले महिलाहरूले आफ्नो अधिकारको लागि आफै पनि थप सक्रिय भएर लाग्नु पर्नेमा जोड दिनुभयो ।

कार्यक्रममा जनज्ञान माविका प्रधानाध्यापक अर्जुनप्रसाद लामिछाने, महिला सञ्जाल शिवपुरी गाउँपालिका-८ की अध्यक्ष मेनुका पाण्डे लगायतले स्थानीय सरकार र महिला तथा सरोकारवालाहरूको सामूहिक पहलबाटमात्र महिलाको आर्थिक पहुँच विस्तार गर्न सकिने धारणा राख्नु भएको थियो । कार्यक्रम र परियोजनाको बारेमा कार्यक्रम संयोजक कृष्णप्रसाद नेपालले जानकारी दिनुभयो ।

कार्यक्रममा शिक्षक, विद्यार्थी, नागरिक समाज, सरोकारवालाहरू, मोटिभेटर, महिला समूहका सदस्य, महिला जनप्रतिनिधि, किशोरी समूहका सदस्य र बालक्लबका सदस्यहरूको सहभागिता रहेको थियो ।

नवदीप श्रेष्ठ