इन्सेक गतिविधिहरू

स्थानीय सरकारसँग जोडिएका सार्वजनिक सरोकारको विषयमा शिवपुरी गाउँपालिकामा सार्वजनिक सुनुवाई कार्यक्रम सञ्चालन भएको छ । अनौपचारिक क्षेत्र सेवा केन्द्र (इन्सेक) को आयोजनामा शिवपुरी गाउँपालिकाको वडा नं. ७ को सार्वजनिक सुनुवाई कार्यक्रम सुनखानीमा ०८० भदौ १५ गते सम्पन्न भएको हो ।

डब्लुपिडि नेपाल र इन्सेकको सहकार्यमा शिवपुरी गाउँपालिका वडा नं. ७ मा 'अधिकार तथा आर्थिक विकासमार्फत महिला सशक्तिकरण' रिन्यु परियोजना अन्तर्गत अन्तर्क्रिया कार्यक्रम सम्पन्न भएको हो ।

कार्यक्रममा शिवपुरी गाउँपालिकाका उपाध्यक्ष वीरबहादुर तामाङले महिलामाथि हुने विभेद, हिंसा र कुरितीजन्य अभ्यास न्यूनीकरण गर्नको लागि इन्सेक जस्ता अधिकारको वकालत गर्ने संस्थाको भूमिका उल्लेखनीय रहेको बताउनु भयो । इन्सेकको कार्यक्रमले जनप्रतिनिधीहरूलाई जिम्मेवार बनाउन र नागरिकको अधिकारलाई प्राथमिकतामा राख्न उत्प्रेरित गरेको उपाध्यक्ष तामाङले बताउनु भयो ।

उपाध्यक्ष तामाङ गाउँपालिकाले आर्थिक तथा सामाजिक सशक्तिकरणको लागि नीति तथा कार्यक्रमहरू बनाएर कार्यन्वयनमा ल्याएको र महिलाहरूको उद्यमशीलता र जीविकोपार्जनको लागि जोड दिइएको बताउनु भयो ।

शिवपुरी गाउँपालिका वडा नं. ७ का वडा अध्यक्ष वीरबहादुर तामाङको अध्यक्षतामा भएको कार्यक्रममा गाउँपालिकाका स्वास्थ्य संयोजक नारायण श्रेष्ठले स्वास्थ्य संस्थामा नै सुरक्षित प्रसुतीको लागि प्रोत्साहन गरिएको र आमा समूह, महिला समूह, ज्येष्ठ नागरिक र अपाङ्गता भएकाहरूको लागि विशेष स्वास्थ्य कार्यक्रम सञ्चालन गरिएको जानकारी दिनुभयो ।

कार्यक्रमको औचित्यमाथि परियोजनाका कार्यक्रम संयोजक कृष्णप्रसाद नेपालले जानकारी दिनुभयो । कार्यक्रममा डब्लुपिडि नेपालका फिल्ड सुपरभाइजर कमला थपलिया, राधिका तामाङ, वडा सचिव नारायण पाण्डे र वडा सदस्य जुनकुमारी तामाङले आ-आफ्ना धारणा राख्नु भएको थियो ।

सहभागीहरूले कार्यक्रममा महिलामाथि हुने घरेलु हिंसाका कमी आउन नसकेकोले स्थानीय सरकारले प्रभावकारी कार्यक्रम बनाएर सञ्चालन गर्नु पर्ने, निःशुल्क पाइने औषधीको पर्याप्त उपलब्धता, कृषि बीउको समस्याको बारेमा जानकारी दिएका थिए ।

कार्यक्रममा वडाभित्र रहेका सात ओटा महिला समूहको सदस्य, मोटिभेटर, स्थानीय बालक्लब र जनप्रतिनिधि तथा नागरिक समाजको सहभागिता रहेको थियो ।

नवदीप श्रेष्ठ