इन्सेक गतिविधिहरू

जिल्लामा रहेका गैरसरकारी संस्थाहरूको आन्तरिक सुसाशन र पारदर्शितामा जोड दिनु पर्ने सरोकारवालाहरूले बताएका छन् ।

इन्सेकको आयोजनामा भदौ ११ गते विदुरमा भएको गैरसरकारी संस्थाहरूको सबलीकरण परियोजना अन्तर्गत सामाजिक संस्थाको आन्तरिक सुशासनसम्बन्धी छलफलमा सहभागीहरूले गैरसरकारी संस्थाहरूले पारदर्शिता, नियमित बैठक, नियमित साधारण सभा जस्ता विषयमा ध्यान दिन जरूरी रहेको बताएका हुन् ।

सहायता सामाजिक संस्थाका अध्यक्ष शिवराम रिजालले गैरसरकारी संस्थाहरूले आन्तरिक सुशासनमा ध्यान दिएमा मात्र आफ्ना कामहरूको विस्वसनीयता बढ्ने बताए ।

'दर्ता गृह मन्त्रालय अन्तर्गत हुने, सम्बन्धन महिला तथा बालबालिका मन्त्रालय अन्तर्गत, सिफारिस स्थानीय विकास मन्त्रालय र कर छुट र भ्याटको कुरा अर्थ मन्त्रालय अन्तर्गत रहेको छ ।'-उनले भने-'यसले गर्दा गैरसरकारी संस्थाहरू अलमलको अवस्थामा रहेका छन् ।'

कार्यक्रममा सहभागी बारका प्रतिनिधि उत्तम घिमिरेले गैरसरकारी संस्थाहरूले आफ्नो नीति निर्माण गरी समान सहभागितामा जोड दिँदै राज्यको नियममा बाँधिएर सेवा प्रवाह गर्नुपर्ने बताए ।

कार्यक्रममा समूह छलफलमा सबैले गैरसरकारी संस्थाहरूको सेवा प्रवाहको निरन्तरताको लागि संस्थागत छविको सुधारमा पनि ध्यान दिनु पर्ने बताएका थिए ।

नवदीप श्रेष्ठ