इन्सेक गतिविधिहरू

स्वास्थ्य, कृषि र पशु सेवा कार्यालयले दिने सेवा सुविधाबारे सेवाग्राहीहरूलाई जानकारी दिइएको छ । इन्सेकद्वारा सञ्चालित स्थानीय समुदायलाई सचेत पार्दै जिम्मेवार निकायलाई जबाफदेही बनाउने इएलपी कार्यक्रम अन्तर्गत जेठ २७ गते घोराहीमा भएको सेवा प्रदायक निकाय र सेवाग्राहीबिचको जिल्लास्तरीय अन्तरक्रिया कार्यक्रममा यस्तो जानकारी दिइएको हो ।

कार्यक्रममा गाविसस्तरीय मानव अधिकार निगरानी समूह, युवा समूह तथा बाल अधिकार चेतना समूहका पदाधिकारीहरूले शिक्षा, स्वास्थ्य र खाद्यअधिकारमा देखिएका समस्याहरू राखेका थिए ।

उनीहरूले विद्यालयमा खानेपानी, प्राथमिक स्वास्थ्य सेवा, पाठ्यपुस्तक अभाव, शिक्षक दरबन्दी अपुगलगायतका समस्या राखेका थिए । त्यस्तै वर्खे बाली लगाउने मौसम आएकाले उन्नत वीउ, रासायनिक मल, जैविक विषादी तथा पशु कृत्रिम गर्भाधानलगायतका विषयमा जिज्ञाशा राखेका थिए ।

कार्यक्रममा जिल्ला जनस्वास्थ्य कार्यालयका प्रमुख घनश्याम पोख्रेलले आगामी असारभित्रै स्वास्थ्य सेवाका जिम्मेवारी स्थानीय तहमा हस्तान्तरण गर्न लागिएको जानकारी दिँदै जनस्वास्थ्य कार्यालयबाट हाल नागरिकलाई दिनसक्ने सेवा र सुविधामा आफूहरू गम्भीर रहेको बताए ।

उनले जनस्वास्थ्य कार्यालयबाट विद्यालयमा प्राथमिक स्वास्थ्य उपचारका सामग्री वितरण गर्ने कुनै कार्यक्रम नभएको उल्लेख गर्दै आवश्यक परे सम्बन्धित स्वास्थ्य चौकीबाट सेवा लिन आग्रह गरेका थिए । उनले विद्यालयमा छात्राहरूलाई 'प्याड' वितरण भन्दा प्याड बनाउने सीप दिन जरूरी रहेको भन्दै त्यसका लागि आवश्यक सहयोग गर्ने प्रतिबद्धता जनाए ।

दाङमा वर्षेनी १४ हजारले गर्भधारण गरेको पाइएको भन्दै ३ हजारले गर्भपतन गराउने जानकारी दिए । उनले अस्थायी साधनका बारे सेचतना फैलाउनुपर्नेसमेत बताए ।

जिल्ला कृषि विकास कार्यालयका माटो विज्ञ दिगम्वर यादवले कृषि उत्पादनका लागि जिल्लामा पकेट क्षेत्रदेखि प्रधानमन्त्री सुपर जोनसम्मका कार्यक्रम सञ्चालन गरिएको भन्दै आवश्यक सेवाका लागि कृषकहरूलाई पनि चनाखो हुन आग्रह गरे ।

उनले सित्तैँमा पाए जे पनि लिने तर ५० प्रतिशत छुट दिँदा वीउ विजनसमेत लिन कृषकहरूले आनाकानी गर्नाले समस्या आएको बताए । उनका अनुसार गुणस्तरयुक्त, उन्नत वीउका बारे सिजनअनुसार स्थानीय पत्रपत्रिका, रेडियोमार्फत जानकारी दिने गरेको उल्लेख गर्दै त्यससम्बन्धमा चासो राख्नसमेत कृषकहरूलाई आग्रह गरे ।

त्यसैगरी जिल्ला पशुसेवा कार्यालयका अधिकृत निमकुमार आचार्यले भाले जातिका पुशपंक्षी पालेर कृषकहरूको आर्थिक भार घटाउन कृत्रिम गर्भाधानको कार्यक्रम ल्याइएको उल्लेख गर्दै कृषकले समयान्तरलाई ख्याल नगरे यसको प्रभावकारितामा समस्या आउने बताए । त्यसका लागि वास्तविक किसान र गाईवस्तुको स्याहारमा लाग्ने प्राविधिकहरूलाई सचेत गराउन आवश्यक रहेको बताए ।

जे.एन.सागर