इन्सेक गतिविधिहरू

समाजको विकाश एवम् परिवर्तनमा समाजिक संस्थाहरूको भूमिका महत्वपुर्ण रहेको ललितपुर र काठमाडौँमा आयोजित एकै विषयको छुट्टाछुट्टै कार्यक्रमका वक्ताहरूले बताएका छन् ।

युएसएआइडी र एफएचआई ३६० को सहयोग तथा गैरसरकारी संस्था महासङ्घ जिल्ला शाखाको समन्वय र अनौपचारिक क्षेत्र सेवा केन्द्र (इन्सेक) को आयोजनामा आयोजित समाजिक संस्थाको सुशासन एवम् जबाफदेहितासम्बन्धी कार्यक्रममा विचार राख्ने वक्ताहरूले यस्तो कुरा बताएका हुन् ।

काठमाडौँमा आयोजित कार्यक्रममा गैरसरकारी संस्था महासङ्घका केन्द्रीय सदस्य डिल्लीप्रसाद घिमिरेले सङ्घ, प्रदेश र स्थानीय तहले बनाउने कानुनहरू समाजिक संस्थामैत्री हुनपर्ने बताएका छन् । सो अवसरमा उनले समाजको परिर्वतन एवम् विकासमा महत्वपुर्ण योगदान दिइरहेका समाजिक संस्थाहरू आफैँ सुशासित हुनुपर्ने धारणासमेत राखेका छन् ।

ललितपुरमा आयोजित कार्यक्रममा गैरसरकारी संस्था महासङ्घ ललितपुरका अध्यक्ष रामहरी घिमिरेले समाज कल्याण परिषद नै खारेज गर्नुपर्ने बताए । समाजिक संस्था दर्ता ऐन परिवर्तन गनुपर्ने बताउँदै उनले परिषद अहिलेको समय अनुसार आवश्यक नभएकाले खारेज गर्नुपर्ने बताएका हुन् ।

सो अवसरमा छलफलका लागि आधारपत्र प्रस्तुत गर्दै घिमिरेले समाजिक संस्था जुन ठाउँमा दर्ता हुन्छ त्यही ठाउँबाट नविकरणको समेत व्यवस्था हुनुपर्ने बताए । उनले भने-'विभिन्न ठाउँमा नविकरण गर्नुपर्ने झन्झट हटाउनुपर्छ ।'

इन्सेक क्षेत्रीय कार्यालयका कार्यक्रम संयोजक गणेश भण्डारीले समाजिक संस्था समाजका लागि आवश्यक भएको बताउँदै समाजमा रहेका विकृति बिसङ्गती हटाउनमा महत्वपुर्ण योगदान गरिरहेको बताए ।

कार्यक्रममा गैरसरकारी संस्थाको सवलीकरणका लागि सञ्चालित परियोजनाकी प्रमुख शर्मिला खतिवडा, इन्सेक केन्द्रीय कार्यालयका रमेशप्रसाद तिमल्सिना लगायतले गैरसरकारी संस्थालाई सरकारको साझेदारका रूपमा लिएर सरकारी कार्यालय अघि बढ्नुपर्ने विचार राखेका थिए ।

सुभाष साह