समयमा औषधि, कृषि मल र बीउ उपलब्ध गराउने सरोकारवाला निकायको प्रतिबद्धता

जिल्ला जनस्वास्थ्य, कृषि तथा पशु सेवा कार्यालयका प्रमुखले जनताका आवश्यकता अनुसारको औषधि, कृषि मल र बीउ समयमा जिल्लाका सबै स्थानमा उपलब्ध गराउने प्रतिबद्धता जनाएका छन् ।

Photo20170609Surkhet

इन्सेक सुर्खेतको आयोजनामा जेठ २५ गते जिल्लास्तरीय परियोजना सल्लाहकार समितिसँगको अनुभव आदानप्रदान बैठकमा इन्सेकद्वारा गठित गुर्भाकोट नपा-१ र २ स्तरीय तथा ४, ५ र ९ स्तरीय मानव अधिकार निगरानी समूहले (साविकको मालारानी र साहारे गाविस) पहिचान गरेका सवालमा सेवा प्रदायक निकायबाट प्रवाह गरिने सेवा तथा स्थानीय स्तरमा देखिएका कृषि शिक्षा, स्वास्थ्य र खाद्य अधिकारको सवालको जवाफ दिँदै ती कार्यालयका प्रमुखहरूले यस्तो प्रतिबद्धता जनाएका हुन् ।

जिल्ला जनस्वास्थ्य कार्यालयका प्रमुख शम्भु ज्ञावलीले राज्यको नीति अनुरूपको निशुल्क पाइने सबै औषधि जिल्ला जनस्वास्थ्यमा समेत उपलब्ध नभएको जानकारी गराउँदै जनतालाई दिनहुँ आवश्यक पर्ने औषधि समयमै उपलब्ध गराउने प्रतिबद्धता जनाए ।

यस्तै जिल्ला कृषि विकास कार्यालयका प्रमुख कालिकाप्रसाद कोइराला र जिल्ला पशु सेवा कार्यालयका निमित्त प्रमुख नारायण न्यौपानेले आफ्ना सेवा केन्द्रमार्फत सहजरूपमा कृषि मल, बीउ, पशु र कृषिबालीमा लाग्ने रोगका औषधि समयमा उपलब्ध गराउने प्रतिबद्धता जनाए । साथै कोइराला र न्यौपानेले कृषि तथा पशु बीमाको बारेमा सचेतना अभिवृद्धि गर्दै बीमा कम्पनीहरूसँग समन्वय गरी गाउँगाउँका कृषकहरूलाई यसतर्फ आकर्षित गराउने प्रतिबद्धता पनि जनाए ।

जिल्ला शिक्षा अधिकारी जीतबहादुर शाहले शैक्षिक क्षेत्रमा देखा परेका विद्यालय व्यवस्थापन समिति गठन, भौतिक संरचना तथा विषयगत शिक्षकको अभाव, पाठयपुस्तक समयमा नपुग्ने र छात्रावृत्ति वितरणमा देखिएका समस्यालाई निराकरण गर्नेतर्फ आफू लागिपर्ने प्रतिबद्धता जनाए । जिशिअ शाहले शैक्षिक क्षेत्रमा देखापरेका समस्याका विषयमा आफूलाई जानकारी दिन आग्रह गर्दै स्थानीय स्तरबाट समाधान हुने समस्यामा तत्काल त्यहींबाट समाधान गर्न निर्देशन दिने र जिल्लाबाट समाधान हुने विषयमा आफूले कुनै कसर बाँकी नराख्ने बताए ।

कार्यक्रममा गुर्भाकोट नपा १ र २ स्तरीय निगरानी समूहका अध्यक्ष निर्देश वली र गुर्भाकोट नपा ४, ५ र ९ स्तरीय निगरानी समूहका अध्यक्ष मोतिलाल बिकले समूहले स्थानीय स्तरमा छलफल गरी पहिचान गरेका समस्या र समाधानका उपायका विषयमा प्रतिवेदन प्रस्तुत गरेका थिए ।

दुर्गा थापा