इन्सेक गतिविधिहरू

अनौपचारिक क्षेत्र सेवा केन्द्र (इन्सेक) द्वारा सप्तरी जिल्लामा नेपाल मानव अधिकार वर्षपुस्तक-२०१७ का लागि सङ्कलन गरिएका घटनाहरूको प्रकाशन पूर्व राजविराजमा मङ्सिर २८ गते समीक्षा गरिएको छ ।

कार्यक्रममा इन्सेक जिल्ला प्रतिनिधि मनोहरकुमार पोखरेलले सन-२०१६ को अवधिमा एक असई, एक बालक, दुई बालिका, चार महिला र कथित बोक्सोको आरोपमा एक जना पुरुषको हत्या भएको जानकारी दिए ।

सबैभन्दा बढी घरेलु हिंसाका २८३ ओटा, बालिका बलात्कारका १७ ओटा, बालिकालाई यौन दुर्व्यवहारका नौ ओटा, महिलामाथि बलात्कारका पाँच ओटा, महिलामाथि बलात्कार प्रयासका नौ ओटा, कथित बोक्सीको आरोपमा दुर्व्यवहारका पाँच ओटा, बहुविवाहका १५ ओटा, बालविवाहका दुई ओटा, विद्यार्थीमाथि कुटपिटको चार ओटा, अपहरणको तीन ओटालगायत ३ सय ७९ ओटा घटना अभिलेख गरिएको जिल्ला प्रतिनिधि पोखरेलले जनाएका छन् ।

कार्यक्रममा बोल्दै जिल्ला न्यायाधीश विनोदकुमार गौतमले राज्यबाट प्राप्त हुने अधिकारका लागि सरकारलाई घच्घच्याउनु र जिम्मेवारी बोध गराउनु पर्ने बताए । अदालतमा १० प्रतिशत पनि मुद्दाहरू आउन नसकेको भन्दै उनले कानुन र फैसलाहरू कार्यान्वयन नभए पिडकहरू समाजमा घुमफिर गर्न पाउने अवस्थाले लज्जित हुनुपर्ने बताए ।

प्रेस स्वतन्त्रता सेनानी बैधनाथ झाको अध्यक्षतामा सम्पन्न कार्यक्रममा निमित्त प्रमुख जिल्ला अधिकारी रामेश्वर अर्याल, सशस्त्र एसपी जनकबहादुर खडका, डिएसपी दानबहादुर कार्की, निमित्त जिल्ला न्यायाधिवक्ता बद्रीबहादुर कार्कीले मन्तव्य राखे ।

मनोहरकुमार पोखरेल