शिक्षा, स्वास्थ्य र खाद्य अधिकारका सरोकारवालाबिच समन्वयात्मक बैठक सम्पन्न

  ०७३ चैत ३० गते

इन्सेक क्षेत्रीय कार्यालय धनगढीको आयोजनामा शिक्षा, स्वास्थ्य र खाद्य अधिकारका सरोकारवालाहरूबिच समन्वायत्मक बैठक चैत ३० गते महेन्द्रनगरमा सम्पन्न भएको छ ।

स्थानीय समुदायलाई सचेत पार्दै जिम्मेवार निकायलाई जबाफदेही बनाउने कार्यक्रम अन्तर्गत जिल्लाका सरोकारवालासँग सेवाप्रवाहमा अभिवृद्धि गर्नुका साथै सरोकारवालाहरूलाई कार्यक्रमका बारेमा जानकारी दिने उद्धेश्यले समन्वयात्मक बैठक आयोजना गरिएको इन्सेक क्षेत्रीय कार्यालयका संयोजक खडकराज जोशीले बताए ।

उनले नागरिकहरूका अधिकार स्थापित गर्नका लागि नागरिक आफैँ सचेत हुनुपर्ने र जिम्मेवार निकायले समेत आफ्नो कर्तव्यलाई इमान्दारिताका साथ पालना गर्नुपर्ने बताए ।

कार्यक्रममा मानव अधिकार निगरानी समूहका पदाधिकारीहरूले गाउँमा भोगिरहेका शिक्षा, स्वास्थ्य र खाद्य अधिकारसँग सम्बन्धित समस्याहरू जिल्लास्थित सेवा प्रदायक निकायका प्रमुख तथा प्रतिनिधिहरू समक्ष राखेका थिए ।

कार्यक्रममा स्थानिय विकास अधिकारी राजेश पौडेलले सेवा प्रदायक निकायमा स्रोत साधनको अभावका कारण नागरिकहर्रूलई चाहेजस्तो सेवा दिन नसकिएको भएपनि सेवालाई अझ राम्रो र व्यवस्थित  बनाउन सरोकारवालाहरू सबैलाई आग्रह गरेका थिए ।

कोमलनिरन्जन भाट