इन्सेक गतिविधिहरू

अनौपचारिक क्षेत्र सेवा केन्द्र (इन्सेक) को सहयोग तथा मानव अधिकार समूह कृष्णपुरको आयोजनामा कृष्णपुर नगरपालिकामा शिक्षा, स्वास्थ्य, खाद्य र आवास अधिकारको सवालमा स्थानीय सरोकारवालाबिच अन्तरक्रिया कार्यक्रम असोज १३ गते सम्पन्न गरिएको छ ।

कार्यक्रममा स्थानीयले कृषकहरूले बिउबिजनको अभाव रहेको, बजार व्यवस्थापन नभएको, सुकुमवासी पहिचान र व्यवस्थापन समस्याले गर्दा नागरिकलाई सुुरक्षित आवासमा कठिनाइ भएको, बजार अनुगमन नभएको, शिक्षक दरबन्दी अपुग भएको, कृषि मल नपाएको, गहुँ र धानको मुल्य नतोकिएकोलगायतका समस्या राखेका थिए ।

कार्यक्रममा कृषि शाखा प्रमुख लालबहादुर धामीले शिक्षा, स्वास्थ्य, खाद्य र आवासका विषय नगरपालिकाको प्राथमिकतामा रहेको बताउनुभयो ।

रासायनिक मलसम्बन्धी जनचेतनाका कार्यक्रम लागु गरेको र व्यवसायिक किसानहरूका लागि एक वडा एक कार्यक्रम सञ्चालन गरिरहेको उहाँले बताउनु भयो ।

आधारभुत विद्यालयमा दिवा खाजा, आधारभुतदेखि माथिल्लो तहका सबै विद्यालयमा सेनेटरी प्याड उपलब्ध गराउनुका साथै खाल्डो खनेर व्यवस्थापन गर्ने गरेको समेत उहाँको भनाइ छ ।

स्वास्थ्य शाखाकी मनिषा पोखरेलले मेडिकल दर्ता भएनभएको अनुगमन गर्नुका साथै प्रत्येक आइतबार औषधि वितरण गरिरहेको बताउनुभयो ।

शिक्षा शाखा प्रमुख अनिता ठगुन्नाले प्राथमिक तहमा पूर्ण रूपमा शिक्षक दरबन्दी रहेको बताउनु भयो । उहाँले मावि र निमाविका लागि नगरपालिका स्तरबाट चार ओटा दरबन्दी मिलान गर्नुका साथै विद्यालयहरूमा इन्टरनेट सेवा सुचारु गराएर अनलाइन सेवा सुरू गरेको बताउनु भयो ।

कार्यक्रममा मानव अधिकार समूह कृष्णपुरले नगरप्रमुखलाई शिक्षा, स्वास्थ्य, आवाससम्बन्धी समस्यासहितको ध्यानाकर्षण बुझाएको छ ।

कृष्णपुर नगरपालिकाका प्रमुख कर्णबहादुर हमालले शिक्षा, स्वास्थ्य, खाद्य र आवास नगरपालिकको प्राथमिकतामा रहेको बताउनुभयो ।

संविधानले मौलिक हकमा व्यवस्था गरेको उल्लिखित विषयहरूलाई नगरपालिकाले उच्च प्राथमिकताका साथ राखेर कार्यान्वयन गर्दै आइरहेको उहाँले बताउनुभयो ।

लिली कुँवर