शिक्षा, स्वास्थ्य, कृषि र खाद्य अधिकार सुनिश्चित गर्ने प्रतिबद्धता

 

गुर्भाकोट नपा १, २, ४, ५ र ९ वडा (साविक मालारानी र साहारे गाविस)का जनताले लामो समयदेखि भोग्दै आएको शिक्षा, स्वास्थ्य, कृषि र खाद्य अधिकार सुनिश्चित गर्ने एक कार्यक्रममा प्रतिबद्धता जनाइएको छ ।

इएलपी कार्यक्रम अन्तर्गत इन्सेक सुर्खेतको आयोजना तथा मानव अधिकार निगरानी समूह मालारानीको समन्वयमा पुस २६ गते मालारानीमा आयोजित सेवाप्रदायक र सेवाग्राहीबिच स्थानीय तह स्तरीय अन्तरक्रिया कार्यक्रममा सहभागी गुर्भाकोट नपा १, २, ४ र ५ वडाका वडाध्यक्षहरूले यस्तो प्रतिबद्धता जनाएका हुन् ।

गुर्भाकोट नपाको आगामी नगरपरिषद बस्नुपुर्व गुर्भाकोट नपा १, २, ४, ५ र ९ वडामा शिक्षा, स्वास्थ्य, कृषि र खाद्य अधिकारका सवालहरूमा अन्तरक्रिया गर्नुपर्नेमा जोड दिँदै वडाध्यक्षहरूले नगर शिक्षा, स्वास्थ्य, कृषि तथा खाद्य अधिकार ऐन तथा कार्यविधि निमार्ण गरी ती अधिकारहरू सुनिश्चित गर्ने बताए ।

उनीहरूले गुर्भाकोट नपा १, २, ४, ५ र ९ वडामा शिक्षा, स्वास्थ्य, कृषि र खाद्य अधिकारको सवालमा हाल देखिएको दर्दनाक समस्याहरूको पहिचान गरी प्राथमिकीकरणको आधारमा समाधान गर्दै जाने उल्लेख पनि गरेका थिए ।

स्थानीय स्वायत्त शासन ऐन निर्माण भइनसकेकोले वर्तमान शिक्षा स्वास्थ्य, कृषि तथा खाद्य ऐनले आफूहरूलाई काम गर्न अवरोध आएको चर्चा गर्दै वडा नम्बर १ का वडाध्यक्ष लालबहादुर खासु, २ का वडाध्यक्ष नोखबहादुर वली, ४ का वडाध्यक्ष प्रशन्नकुमार शाह र ९ का वडाध्यक्ष लालबहादुर पुनले आगामी नगरपरिषद पछि सबै ऐन तथा कार्यविधी तयार गरी त्यस्ता अधिकार सुनिश्चित गर्ने प्रतिबद्धता गरेका हुन् ।

कार्यक्रममा गुर्भाकोट नपाका नगर शिक्षा संयोजक नरेश भट्टराईले अगामी शैक्षिक सत्रदेखि गुर्भाकोट नपा १, २, ४, ५ र ९ वडामा रहेका सबै सामुदायिक विद्यालयहरूमा विषयगत र दरबन्दी अनुरूपको शिक्षकहरूको पदपुर्ति गरिने र शिक्षक आचरण पालना नगर्ने शिक्षकहरूलाई तत्काल कारबाहीको दायरामा ल्याउने प्रतिबद्धता व्यक्त गरे ।

दुर्गा थापा