इन्सेक गतिविधिहरू

अनौपचारिक क्षेत्र सेवा केन्द्र (इन्सेक) प्रदेश २ कार्यालय जनकपुरको आयोजनामा क्षीरेश्वरनाथ नगरपालिका-६ स्थित माध्यमिक विद्यालय सखुवा बजारमा भदौ १ गते शिक्षाको अधिकारसम्बन्धी शिक्षक, अभिभावक र विद्यार्थीहरूबीच अन्तरक्रिया कार्यक्रम सम्पन्न गरिएको छ ।

क्षीरेश्वरनाथ नगरपालिकामा कियोस परियोजना अन्तर्गत इन्सेकले गठन गरेको मानव अधिकार निगरानी समूह, नगरपालिका जनप्रतिनिधिहरूले छनौट गरेर मावि सखुवामा यस कार्यक्रमको आयोजना गरिएको हो ।

कार्यक्रममा कक्षा ९ र १० छात्र छात्राहरूले विद्यालयमा खानेपानी र शौचालयको अभाव हुनुको साथै कम्प्युटर कक्षाको लागि शिक्षकको अभाव भएको बताए ।

अभिभावकहरूले विद्यालयमा कम्प्युटर भएर पनि दक्ष शिक्षक नभएकोले आफ्ना छोराछोरीले कम्प्युटर कक्षा बारे सधैँ गुनासो गरेको बताए ।

शिक्षकहरूले आफूहरूको दरबन्दी प्रावि र निमाविको भएको पनि सोही बराबरको सेवा सुविधा माथिल्लो कक्षा ९ र १० मा समेत कक्षा लिनेको गरेको बताए ।

विद्यालयका प्रधानाध्यापक सन्तोष यादवले विद्यालयमा भवन, शिक्षण सामग्रीहरूको अभाव हुनुको साथै मावि दरबन्दी समेत नभएकोले समस्या भएको बताए ।

उनले छात्राको लागि शौचालयको अभाव रहेको स्वीकार गर्दै नगरपालिकासँग माग गरेको जानकारी दिए ।

कार्यक्रममा वडाध्यक्ष मानबहादुर श्रेष्ठले यस कार्यक्रमबाट थाह भएको समस्याहरूलाई समाधानको लागि नगरपालिकाको बैठकमा राख्ने प्रतिबद्धता व्यक्त गरे ।

इन्सेक प्रदेश २ का संयोजक राजु पासवानले कार्यक्रममा उठेका सवाल, समस्याहरूलाई आफूले प्रतिवेदन तयार पारेर समाधानको लागि सम्बन्धित निकायमा पठाउने र नगरपालिका सबभन्दा नजिकको सरकार भएको हुँदा मेयर र उपमेयरसँग समेत छलफल गर्ने बताए ।

कार्यक्रममा अजय साहले शिक्षा क्षेत्रमा देखिएका समस्या तथा समाधानका उपायहरू बारे कार्यपत्र प्रस्तुत गरेका थिए ।

अजयकुमार साह