इन्सेक गतिविधिहरू

अनौपचारिक क्षेत्र सेवा केन्द्र (इन्सेक) प्रदेश २ जनकपुरधामको आयोजना तथा विष्णुपुर गाउँपालिका स्तरीय मानव अधिकार निगरानी समूहको सहकार्यमा विष्णुपुर गाउँपालिकामा पुस २१ गते शिक्षाको अधिकारबारे शिक्षक, अभिभावक र विद्यार्थीबिच अन्तरक्रिया कार्यक्रम सम्पन्न गरिएको छ ।

विष्णपुपुर गाउँपालिकास्थित जनता मावि इटहरी विष्णुपुरमा आयोजित कार्यक्रममा सहायक प्रधानाध्यापक जगदीशप्रसाद यादवले शिक्षा र सचेतनाको अभावमा बालविवाह, बाल श्रम, लागुऔषध दुव्र्यसनी र विद्यालय छाड्ने प्रवृत्ति चुनौतीका रूपमा रहेको बताउनु भयो ।

सीमित श्रोतसाधनका कारण अपेक्षित लक्ष्य प्राप्त गर्न नसेकेको भएपनि विगतको तुलनामा शैक्षिक सुधारमा प्रगति हुँदै आएको बताउँदै उहाँले शैक्षिक सुधारका लागि अभिभावक, विद्यार्थी, जनप्रतिनिधि र सबै सरोकारवालाको पहलकदमीको आवश्यक्तामा जोड दिनु भयो ।

शिक्षक मिथलेशकुमार यादवले कोभिड–१९ का बेला आइसोलेशन केन्द्र सञ्चालन रहेको विद्यालयमा भएको समान तोडफोडको क्षतिपूर्ति विद्यालयले नपाएको गुनासो गर्नु भयो ।

अभिभावक पुनमदेवी मण्डलले विद्यालय व्यवस्थापन समितिको नियमित बैठक, भेला नहुने गरेको र पदाधिकारीले विद्यालयलाई समय नदिने गरेको आरोप लगाउनु भयो ।

बाल अधिकार चेतना समूहका पुष्पराज अमातले परीक्षा नजिकिँदा समेत स्वास्थ्य शिक्षाको पुस्तक उपलब्ध नहुँदा पढाइ प्रभावित भएको गुनासो गर्नु भयो ।

बाल अधिकार चेतना समूहका राहुलकुमार मण्डलले विद्यालयमा कम्प्युटर र विज्ञान प्रयोगशाला नभएको तथा विद्यार्थीलाई अतिरिक्त क्रियाकलापमा समावेश नगराइएको गुनासो गर्नु भयो ।

विद्यार्थी सिमरन साहले विद्यालयमा नर्स नभएको तथा सेनेटरी प्याड फेर्ने र व्यवस्थापन गर्ने ठाउँ नरहेकोले छात्राहरुलाई समस्या रहेको बताउनु भयो ।

नेपाल स्वास्थ्य फुड संयोजक प्रदिपकुमार मण्डलले सामुदायिक विद्यालयहरूमा कक्षा सञ्चालन र अर्थ व्यवस्थापनमा समस्या देखिएको बताउनु भयो ।

मनोहरकुमार पोखरेल